Shillong, Jymmang 16 : U Director General of Police (DGP) ka Jylla Dr LR Bishnoi hynne ka sngi Ba-ar, ula pyntip ba ki Superintendent of Police jong ki 5 tylli ki District ka Ri-lum Garo, ki sa phah ia ki kaiphod hapoh ka shitaiew, ban pynthina ia ka khubor halor ka jingthmu ki ehrang barim ka GNLA ban pynkhie im pat ia ka kynhun.
“Baroh ki SP jong ki District ka Ri-lum Garo ki dang wad ban pynshisha ia ka khubor hala ki jong ki jaka. Hadien bala dep ban pynthikna, kin sa phah ia ka kaiphod sha ngi. Ngi khlem buh satia ia kano kano ka por namar kan shipor ban wad jingtip namar ki don ki jaka kiba don sha kyndong. Kin hap ban pynthikna bad wad jingtip na kawei pa kawei ka jaka. Nga tharai ba hapoh ka shitaiew, kin sa lah ban aiti ia ka kaiphod” ong u Bishnoi haba iakren bad ki nongthoh khubor.
Haba kylli, u DGP ula ong ba ki khubor bala ioh lum kin sah kum ki khubor ba ioh lum tad haduh ban da lah pynshisha bad bynrap “Hadien ba ngi la ioh pdiang ia ka kaipod ba pynthikna ha ka kti jong ngi ngin sa lah ban mih bad kren sha phi halor kane ka kam”.
“Shisien ba ngi la ioh pdiang ia ka kaiphod na baroh ki District ngin sa lah ban ong haduh katno kane ka jingtip ka dei kaba shisha” ula bynrap.
Kane ka kam kala mih pyrthei hadien ba ka internal memo jong u Ophisar ha ka kyrdan DySP ka West Garo Hills, kala lait pyllait bad mih ha ki rynsan social media.
Kane ka internal memo kala kam ba ki ehrang barim bad kiba pyndem wait kila iakynduh lang ban pynkhie im ia ka GNLA bad kila pynlong ruh ia ki jingialang ha kylleng ki jaka ban pynrung dkhot ia ki samla.
Kala pyntip ba ki don palat 500 ngut ki samla na kylleng ki District ka Ri-lum Garo kiba la pyniasoh bad ka kynhun bad ia kine ki dkhot la phah mynta sha Nagaland bad Myanmar ban hikai pyntbit ha ki tiar siat. Kala kam ruh ba ki don bun ki nongkhaii bad ki hehspah kiba bei tyngka ban pynim pat iaka GNLA.
