Shillong Jymmang 16: U Myntri Rangbah ka jylla u Conrad K Sangma hynne ka Sngi Baaar, ula plie pyrda iaka jingrakhe dap 100 snem jong ka Jaiaw Presbyterian Higher Secondary School kaba don ha Jaiaw Pdeng.
Ha ba kren ha ka jingialang u Myntri Rangbah ula ai jingiaroh iaka skul, ki dkhot jong ka Managing Committee bad ki nonghikai kiba la don ia ka bynta kaba khraw ha kaban btin lynti ia kane ka jaka pule ha baroh kine ki snem naduh ka por ba dang sdang ia kane ka skul kaba la noh synniang shi katdei ha kaban kyntiew iaka pule puthi jong ki khynnah khamtam ia kito kiba wan na ki longing kiba duk.
I congratulate the Managing Committee and all the people involved in making this school a shining example and a ray of hope for our children. I wish the celebrations a grand success. pic.twitter.com/FAqUlnQAOZ
— Conrad K Sangma (@SangmaConrad) May 16, 2023
“Nga hap ban shim ia kane ka kabu ban ai khublei ia baroh kiba la trei shitom bad kiba don jingiadei bad ka skul ha ki bynta bapher bad ban pynlong ia ka kumba ka long mynta bad nga ngeit skhem haba phai sha phi baroh phin don ia ka jingsngew hun ban iohi kumno ka kala iaid shaphrang ha ki snem kiba la leit” ong u Myntri Rangbah.
Ula ong kane kadei ka sngi kaba kyrpang ban kynmaw ia baroh ka jingjop jong ka skul ha ki phew snem kiba la leit bad kadei na ka bynta ka bha ka miat jong baroh, ba ka skul kadei ban don iaka jingthmu ban iaid shakhmat bad ban don iaka thong bad ka jingangnud kaba lah ban wanrah iaka jingkylla kaba bha ha ka pule puthi jong ki khynnah skul.
“Phi dei ban don ia ka thong namar ba kan kdew ia ka lynti ban trei bad ban iaid shakhmat ryngkat bad ka jingdon ia ka jingiohi jngai ban pynurlong iaka thong. Nga kyntu ia ka Managing Committee bad ia baroh ki dkhot jong ka Balang bad kumjuh ia kiba la pyndep iaka jingpule na kane ka skul bad kiwei kiba iadonbynta bad ka skul ba kin buh iaka thong bad ban iaid shakhmat ban pynurlong bad ban kynjoh ia ki mawmer kiba kham shajrong na ka bynta ka skul ha ki snem ban dang wan” ong u Conrad.
Nalor kane ula kren ruh ha kaba iadei bad ka jingeh kaba iakynduh da ka tnad pule puthi haka jylla.
“Lada ngi leh ia kano kano ha kaba iadei bad ka pule puthi, ngi dei ban buh ha dohnud ia ki khynnah pule, haba ngi shim ia ka rai kum ki nonghikai, nongialam sain pyrthei ne kum ka sorkar. Kaei kaba mih na ka rai kaba ngi shim kadei ban long na ka bynta ki khynnah pule” ong u Conrad.
U Myntri Rangbah ula iathuh ruh ba ha Meghalaya ki don la jan kumba 14000 tylli ki skul bad palat 55,000 ngut ki nonghikai kaba long bun bha, haba ianujor bad kiwei pat ki jylla kiba rit ha ka thain shatei lam mihngi.
Ula ong ba ka jylla ka pynlut T.2200 Klur man la ka snem ha kaban ai iaki Grant bapher sha ki skul bapher bapher bad wat hapdeng ka jingbhah tyngka kaba jur bha bad la phaikhmat bha sha ka pule puthi, ka jylla ka dang donkam ban trei shitom ban long kum ka jylla kaba wan shakhmat bha ha ka liang ka pule puthi ha ka ri.
U Myntri Rangbah ula pyntip ruh ba shen ka sorkar jylla kan sa thaw noh ia ka Education Commission kaban khmih ha baroh ki liang ha kaban pynbha iaka pule puthi ha ka jylla.
Ha katei ka jingrakhe u Myntri Rangbah ka jylla ula pynbna ban ai iaka Grant kaba T.20 Lak na ka Chief Minister’s Special Development Fund na ka bynta ban tei iaka building jong ka skul.
Ha kane ka jingialang la iadonlang u Chairman ka Meghalaya State Planning Board u Bah Metbah Lyngdoh, u Moderator jong ka KJP Assembly u Rev WP Marbaniang, ki dkhot ka Managing Committee, ki nonghikai, ki khynnah skul bad kiwei kiwei.
