Guwahati, Jymmang 16: Hadien ka jingjia iakynad pher jaidbynriew ha Manipur hapdeng ki Meitei bad ki riewlum ka Jylla, haduh 6520 ngut ki briew kila phetwir na ka Jylla bad poi rieh tngen sha ki Jylla ba marjan kum ka Mizoram bad ha Assam.
Kat kum ka khubor ki bor Sorkar, haduh 7900 ngutki briew kila phet sha kine ki artylli ki Jylla ka thain Shatei Lam Mihngi bad haduh 1400 ngut kila shong ha ka jaka sah ba shipor ha Cachar District, Assam.
Haduh 70 ngut ki briew kila iap na kane ka jingiakynad pher jaidbynriew kaba la khih phyllung naduh ka 3 tarik Jymmang hadien ka jingiaid rally jong ka ATSUM ban pyrshah ia ka jingdawa ki jaidbynriew Meitei ban ai jingiathuh kum ki Scheduled Tribe (ST) ka Jylla.
‘Haduh 6520 ngut ki nongshongshnong ka Manipur kiba dei na ka jaidbynriew Chin, Kuki bad Mizo kila sah mynta ha ki jaka sah ba shipor ha ki hynrew tylli ki District ka Jylla. Napdeng kine, kumba 700 ngut kila poi sha Mizoram hynnin ka sngi Nyngkong” ong ki bor Sorkar.
Haduh 2238 ngut kila poi sah riehtngen ha Saitual District, 2117 ngut ha Aizwal, 1993 ngut ha Kolasib, 141 ngut ha Champai, 17 ngut ha Khawzawl bad 14 ngut ha Serchhip District, ong ki heh Sorkar ka Mizoram.
Ha Cachar District ka Assam, da ki spah ngut ki briew na Manipur kila sdang ban leit phai biang sha ki jaka sah riehtngen ba shipor hadien ka jingkhie biang ia ka jingiakynad hapoh ka Jylla jong ki.
Shuwa kane, kumba 2200 ngut ki nongshongshnong ka Manipur na Jiribam District kila wan poi ha Cachar ha ka miet 5 tarik hadien ka jingkulmar kaba shyrkhei hapoh ka thain.
