Shillong, Jymmang 05 : U Myntri Rangbah ka Jylla Conrad K Sangma hynne ka sngi Thohdieng, ula pyntip ba ka shimpor haduh lai snem tang ban pynwandur ia ka mining plan kaba dei thik iaka Jylla Meghalaya haba pynpaw ba da ka jingioh sdang biang ia ka jingtih dewiong da ka jingstad saian, kan sa wanrah ruh ia ka jingkylla ha baroh ki liang.
U Myntri Rangbah ula pynpaw ia kane ha ka jingialang pynkup burom ia u (CM) da ki nongtih par kum ka dak ka jingithuh ia ki jingtrei shitom jong ka Sorkar Jylla ban lah pynsdang ia ka jingtih dewiong da ka jingstad saian, kaba la pynlong hynne ka sngi ha Khliehriat.
Kiba la iadonlang ha kane ka sngi ki dei u Symbud Myntri Rangbah bah Sniawbhalang Dhar bad ka MLA ka Sutnga-Saipung kong Santa Mary Shylla.
Haba kren ha ka jingialang, u Myntri Rangbah ula ong ba ka khyllipmat ia kaba baroh kila ialumlang ka long kaba kongsan bad ban sa khana pateng namar ka jingkhang tih dewiong da ka NGT kala ktah jur ia ka jingim jong ki nongshongshnong ka Jylla khamtam ki paidbah ka East Jaintia Hills.
Thank the coal owners & project proponents for expressing their words of appreciation to the Government for this historic milestone.
We are proud to fulfill the promises to the people of #Meghalaya & we will continue to serve our people with this commitment.
— Conrad K Sangma (@SangmaConrad) May 5, 2023
“Ka dei ka jingjynjar bad ka jinghiar ka ioh ka kot jong ki paidbah kiba shaniah ha ka kam tih marpoh khyndew kaba la ai mynsiem ia nga ban pynthikna ba ka kam tih dewiong kan sdang biang ha ka Jylla jongngi” ula ong.
Pule lang ia kane: Bamduh ka ding ia ka Iing u Rangbah Shnong ka Nongagang
U Conrad ula pyntip ba da ka jingweng noh ia ka hukum khang tih dewiong hadien ka hukum jong ka Iingkashari Supreme Court, ka Sorkar kala pynwandur ia ka mining plan jong ka Jylla haba bud ia ki kyndon ia ka jingtih mar hapdeng ka jingshngain bad ka jingiada ia ka mei mariang.
“Ha kine ki lai snem bala leit, ngi la trei khlem shongthait bad ka Sorkar India ban wanrah ia ka rukom treikam kaba lah ban pyntrei tang ha ka Jylla Meghalaya haba buh hakhmat ia ka jingpher jong ka Jylla namar ba ki jaka puta ki dei jong u paidbah” ula bynrap.
U Myntri Rangbah ula ong ruh ba ka jingpynwandur ia ka mining plan kaba dei thik tang ia ka Jylla Meghalaya ka dei ka jingeh kaba khraw bha la ka dei ia ka Sorkar India ne ka Sorkar Meghalaya ruh kumjuh.
“Nga dei, ha kane ka por, ban ithuh ia ka jingtrei shitom jong ka Tnad Mining bad ka kynhun ki stad ain, stad mariang bad ki nongtih par kiba la kyrshan ia ka sorkar ban pynthikna ban gin lah wanrah ia ka plan bad ka policy bad mynra ka sngi hadien ka jingiakhun ba bun snem, ka dei ka khyllip mat jong ka jingkmen ia iwei pa iwei na ngi” ula ong.
U Conrad ula pyntip ruh ba ka Sorkar kan nang iai bteng ban iatreilang bad ka Sorkar India khnang ba suki suki, kiwei kiwei ki nongtih par ruh kin lah ban ioh ia ka mining lease. ‘Ngin sa bthah ia ka Tnad Mining ban pynlong ne ai jinghikai ba kumno ban aplai ia ka mining lease bad kyntu ia kito kiba la ioh mining lease ba kin btin lynti lem ia kiwei pat ki nongtih par” ula bynrap.
Ula bynrap ba ka jingioh tih dewiong biang ha Jylla kan sa ktah ia baroh kiwei ki karkhana. “Ka jingtih dewiong ha kane ka khep kam dei satia tang shaphang ka tih dewiong bad ki nongtih par hynrei kan sa wanrah ia ka jingkylla ha ka ioh ka kot ha kiwei kiwei ki jait kam, kiban lam sha ka juk ka ioh ka kot ba thymmai ia ka Jylla” ong u Conrad.
Shuwa kane, u Secretary ka Tnad Mining & Geology Bah E Kharmalki ula pyntip ba kila don 17 ngut ki briew kiba la aplai ia ka mining lease bad sa saw tylli ki aplikeshon yn sa phah noh sha ka Sorkar India.
Pule lang ia kane: Rai ka PDF ban leit bynrap noh sha ka NPP halor ki kyndon kular elekshon
