Shillong, Jymmang 5: Ka East Jaintia National Council (EJNC) kala dawa ia ka jingtuklar jong u Myntri Rangbah ka Jylla Conrad K Sangma ban bishar thymmai ia ka Standard Operating Procedure (SOP) ha kaban ai ia ka propecting licence lane mining lease ban tih dewiong ha ka Jylla Meghalaya.
Ha ka dorkhas bala aiti sha u CM hynne ka sngi thohdieng, ka ENJC kala ong “Ngi kyrpad jur ia ka Ophis jong phi ban bishar thymmai ia kaba Office Memorandum halor ka jingdonkam jaka ban tih dewiong na ka 100 hectare sha ka 100 hectare duna bad ka jingiateh kular hapdeng ki trai jaka bad ki nongaplai licence, haba ki nong aplai kim dei ki trai jong ka jaka ban tih par khnang ba ki riew paidbah kin lah ban aplai ia ki jingbit ba donkam ha ban trei kam tih dewiong hapoh ka Jylla Meghalaya bad khamtam eh ha Ri-lum Jaintia”.
Kala ong ba ki paidbah jong ka District kila iakynduh ia shibun ki jingeh naduh ka por ba ka Sorkar Jylla kala wanrah ia ka SOP ha ka Office Memorandum (OM) ba 5 tarik Lber 2021.
Pule lang ia kane: Phah ka Sorkar ia ka Kynhun sha Imphal ban iarap ia ki Nong Meghalaya ba kwah wan phai shala Iing
“Ka SOP ban ai mining lease ia u dewiong, kaba donkam jaka ym duna ia ka 100 hectare bad ka jingiateh kular hapdeng ki trai jaka bad ki nongaplai kan ym ai jingmyntoi satia ia ki trai jaka” kala ong haba bynrap b aka 100 hectare ka jaka kala bun palat ia uwei u trai riewlum ban thied. La shem ba kiba bun ki trai riewlum ki don ia ki jaka bay m kot ia ka SOP (100 hectare).
Ka ENJC ka ong ba ha ka chapter 1 jong ka Office Memorandum (OM) ha ka Para D (Checklist), la pynpaw ba “Ka jingiateh kular hapdeng ki trai jaka bad ki nongaplai lease, ha kaba ki nongaplai kim dei ki trai jong ki jaka ban tih par. “Naba ka SOP kam long shai halor ka kyntien “ki Nong aplai ki bym dei ki trai jaka”. Kum kane ka SOP kan plie lynti ia ki nongaplai ki ba dei ki bar jylla/company ban shim kabu ia ka jingiateh kular bad ki trai jaka ba kin trei ia ka kam tih dewiong” kala ong.
Ka dorkhas kala ong ruh “Kum kane ka soskular kan knieh noh ia ka hok jong ki trai shnong kiba shaniah ia ka kamai jakpoh na ka kam tih dewiong bad kiwei kiwei ki kam ba don jingiadei ba kane ka kam. Nalor mkane, ka ENC ka sngew ba ia kane ka kyndon dei ban shong bishar da ka Ophis jong phi khnang ban ailad tang ia ki trai riewlum ba kin iasoi soskular hapdeng jong ki ym ki bar jylla”.
“Nalor kata, lada ym shong bishar thymmai ia kane ka kyndon da ka ophis jong phi, kane kan nang pynshlur ia ki kompani bah eh ba kin thied ia bun bah ka jaka ban pyniaid marwei ia ka kam tih dewiong bad kiwei kiwei ki kam ba don jingiadei bad u dewiong hapoh ka District. Katba, ki riew paidbah ki bym lah ban thied jaka kat kum ka SOP kin sa shah ktah jur bha” kala ong.
Pule lang ia kane: Assam: Siat ki Pulit na kjat ia u briew ba lehbeijot bad pyniap ia ka Khynnah 12 snem
