Shillong, Jymmang 03 : Ha ka jingjia kaba kdew sha ka jingduna ki kor sumar ha ki hospital ka Sorkar Jylla bad ruh ka jing sumar torti, iwei I Khunlung ba dang shu kha ha Ganesh Das Hospital, ila khlad noh na kane ka pyrthei hynnin ka sngi Bal-ar namar ka jingbym don ia ki kor ba iarap ring mynsiem (ventilator).
Ine I Khunlung ila iap ha Nazareth Hospital hadien bala pynkynriah kyrkieh na Ganesh Das Hospital na ka daw ka jingbym don ia kane ka kor. Ia ka Kmie jong ine I Khunlung ruh la pynkynriah sha NEIGRIHM bad don hapdeng ka jingshitom kaba jur namar ka jingkynnoh sumar torti ki doktor ka Ganesh Das Hospital.
Katkum ki khubor la iathuh ba ia ine i khunlung la kha ha Ganesh Das Hospital ha ka 1 tarik u Jymmang bad la phah kynriah noh sha Nazareth Hospital namar ba kane ka jaka sumar ka Sorkar kaba dei peit thik tang ia ka jingsumar ia ki Longkmie ba kha khun bad ki Khunlung, kam don ia ka kor iarap ring mynsiem (ventilator).
Ine I Khunlung ila khlad noh ha Nazareth Hospital hynrei ym lah pat ban pynthikna ia ki daw ka jingiap jong i.
Ka Kmie jong ine I Khunlung kala shitom jur hadien ba kha ia I Khun bad la pynkynriah mar mar ia ka sha NEIGRIHM ha kane ka juh ka sngi. La ithuh ba kane ka Kmie ba kyrteng Kong Patlima Rani, la lap ba u don u thirnia ba sahkut hajan u khyllai ha ka por ba kha ia I khun ha Ganesh Das bad namar ba ki Doktor kane ka hospital sorkar kim lah ban sei ia une u thirnia, kila phah wut wut sha NEIGRIHM ban pyllait ia ka na ka jingma.
Na ka liang jong ki baha ïing kane ka kmie, kila kynnoh ba kane ka jingkhlad I khunlung bad ka jingsahkut u thyrnia hajan u khyllai ka kmie kadei namar ka jingtrei torti ki nongsumar ka Ganesh Das Hospital hynrei naka liang ki bor pyniaid jong kane ka Hospital orkar kila kyntait ia kane ka jingkynnoh.
