Nongpoh, Jymmang 03: Kum ka dak ka jingsngewlem halor ka jingkhlad noh ka samla Walinda Binong kaba dei ka samla pule jong ka Mody University ha Rajasthan, ka shnong Nongagang Marngar kala rai ban pynlong da ka jingthang mombati haka 5 tarik mynta u bnai naduh ka por 5 baje janmiet hakhmat ka Nongpoh Shopping Town Complex.
Kum ban shu pynpaw ba ka samla Walinda Binong kala khlad noh na kane ka sla pyrthei haka 27 tarik u bnai Ïaiong ha jaka sah jong ka ha Rajasthan, kaba la pynshaiong ngaiñ ïaka ïing ka sem jong katei ka samla bad ka shnong ka thaw halor ka rukom khlad jong ka, kaba haduh mynta naka liang ka ïing ka sem jong katei ka samla kim pat lah ban pdiang bad ban ngeit.
Ha katei ka sngi yn pynlong tang ka jingthang mombati kum ka dak ka jingsngewlem ïa katei ka samla bad la kyrpad ruh ïaki paidbah naduh ki longkmie ki longkpa, ki khun samla bad ki kynhun sngewbhalang bapher bapher kiba don ka jingsngew ba kin shim bynta lang ha katei ka sngi, ban buh ruh ka jingdawa sha ka sorkar jylla bad ka sorkar pdeng ba kan shimkhia ban pynlong ka jingtohkit bad ban ai ka jingbishar kaba hok ïa katei ka longiing khnang ba kum kitei ki jingjia kin nym jia shuh nangne shakhmat bad ban pynthikna ba kan don ka jingshngaiñ ïaki samla pule kiba mih naka jylla ban leit sha ki jaka bapher bapher jong ka ri.
Halor ka jingkhlad noh kane ka samla Walinda, ka Nongpoh Area Women Welfare Association (NAWWA) ka la phah ia ka khubor sngewlem sha ki bahaiing hasem jong ka kumjuh ruh ka jingkitbok ba ka mynsiem jong katei ka samla kan ioh ia ka jingjah thait ka bymjukut.
Ha kajuh ka por ka NAWWA kum ka seng kaba peit ia ka bha ka miat jong ki kynthei, ka la dawa na ki bor ba dei khmih jong ka sorkar jylla ba kan shimkhia ha kaban phah tohkit janai halor ka jingkhlad jong ka samla Walinda bad ruh ban pynioh ia ka jingbishar kaba hok ia ki bahaiing hasem jong katei ka samla.
