Shillong, Jymmang 02 : Ka National People’s Party (NPP) ka la ap mynta satang ia ka People Democratic’s Front (PDF) ban shim rai ha kaban wan iasoh noh bad ka party.
Haba pyntip ia kane hynne ka sngi Ba-ar, u National President ka NPP bad Myntri Rangbah ka Jylla Conrad K Sangma ula ong “Ngi la iakren bad ki (Nongialam PDF) bad ngi la iakren ruh bad ki halor ka lynti ban wan synrop lang noh (merger)”.
“La pyntip sha nga ba ka PDF ka dang ap ia ka jingialang jong ka Central Executive Committee katba ngi dang iakren…bad hadien kane kin sa pynlong sa ia ka jingialang General Council…namar kata nga tharai ki Nongialam ka PDF kin dei kiba biang eh ban iathuh ia phi ia kaei ka rai ba kila shim” ula ong.
Haba kylli la ka don ka jingkular shuki Myntri ia ki MLA ka PDF, u Conrad ula ong “Ia myntahi ngi dang iakren tang ia kane ka kam..kumta ngin ia ap shuwa ia ka rai ba kin shim bad ngin sa shim rai pat kumno ba ngin jam shakhmat”.
Ka PDF ka don ia arngut ki MLA kata u Bah Banteidor Lyngdoh na Mawkynrew bad u Bah Gavin M Mylliem na Sohra.
Shuwa kane, u Bah Banteidor uba dei u Working President ka PDF ula ong ba ka party kan sa shim ia ka rai halor kane ka kam yn da la poi ka por.
Pule lang ia kane: Sikkim: Leit iarap ka BRO ia 40 ngut ki nongshang sawari ba sahkut ha Nathula
