Shillong Iaiong 29: U Dr Rangksan Singh Thangkhiew uba dei u nongseng bad Managing Director jong ka Supercare Hospital, Shillong, ula ioh pdiang iaka ‘Distinguished Career Award’ ha ka jingïalang jong ka ‘Northeast Healthcare Summit 2023’ kaba la pynlong ha Radisson Blue Hotel, Guwahati, Assam ha ka 28 tarik, u Ïaïong.
Kane ka jingïalang ka ai iaka jingithuh bad sngewnguh ïa ka jingtrei minot bad ka synniang jong ki katto katne ki briew ha ka liang ka jingsumar ha ka thaiñ shatei lam mihngi.
Ki Kongsan ha katei ka jingïalang kiba kynthup ia u Keshav Mahanta, u Myntri ka Koit ka Khiah jong ka Sorkar Assam bad u Dr. Sapam Ranjan Singh, u Myntri ka Koit ka Khiah bad ka IPR jong ka Sorkar Manipur.
Kum kane ka jingïalang, la pynlong nongkong eh ha u snem 2019, bad la saw snem mynta kane ka jingïalang ka ai ka lad ban ithuh ia ki seng ha ka koit ka khiah na Assam. Ha ka sien ba nyngkong mynta u snem, kane ka jingïalang kala nang pyïar ki kti treikam haduh ban kynthup lang ïa baroh ki thaiñ shatei lam mihngi kaba kynthup ïa ka jylla Sikkim. Kane ka jingïalang ka pyrshang ruh ban ai jingithuh bad ban sngewnguh ïa ka jingtrei shitom, ka jingshakri ba pura bad ka jingrai kut jong ki seng bad ki briew ban ai sha ka tnad ka koit ka khiah ha ka thaiñ.
U Dr. R.S. Thangkhiew ula ïoh ïa kane ka khusnam na ka bynta ka jingtrei shitom bad ka jingïalam lynti ka jong u ha ka bynta ka tnad ka koit ka khiah ha ka jylla Meghalaya.
U Dr. R. S. Thangkhiew ula pyndep ïa ka jingpule MBBS na ka Assam Medical College ha u snem 1980 bad ula pyndep ïa ka MD (Medicine) na ka PGIMER, ha Chandigarh ha u snem 1985 bad ula long ruh uba nyngkong eh ha ka thaiñ shatei lam mihngi (Northeast) ban long u Superspecialist ha ka Gastroenterology, ha kaba ula pyndep ïa ka DM (Gastro) ha u snem 1987 na PGIMER, ha Chandigargh.
Ula long ruh uba nyngkong ban wanrah bad leh ïa ka ERCP (Endoscopic Retrograde Cholangiopancreatography) kaba long ka rukom sumar kaba kynthup lang ïa ka endoscopy bad ka x-ray khnang ban lap bad ban sumar ïa katto katne ki jait jingpang jong ka biliary ne ka pancreatic ductal systems.
