Shillong, Iaiong 19: U Myntri ka tnad jngoh kai pyrthei bah Paul Lyngdoh hynne ka sngi Balang ula pyntip ba ka sorkar ka kut jingmut ban pynkylla iaka Khyndailad tang kum ka jaka iaid ki paidbah bad yn ym shah shuh ban iaid kali napdeng ka Khyndai Lad.
Haba kren sha ki lad pathai khubor u bah Paul ula ong ba ia katei ka sienjam la kyrshan bad Mynjur ruh da u Myntri Rangbah ka jylla Conrad K Sangma bad iaka ba mynta kaba donkam eh ka long ban pyntreikam ia ki aiñ.
U bah Paul ula ong ba ban leh ia kata, donkam ban sdang shwa na Khyndailad nangto naba rung shapoh kan dei beit tang ka lynti iaid kjat jong ki paidbah bad iaki nongdie madan, ka sorkar kala don ka jingpynkhreh jaka la ka jong.
“Ban shait ban khlain ki nongshong shnong donkam ban iaid kjat bad dei na kata ka daw ba ka sorkar ruh ka la shim ia katei ka sienjam ban pynkylluid ia katei ka bynta jong ka Khyndailad ba kan long noh tang ka jaka iaid kjat khlem don shuh ka jingpynwit na ki kali lane na ki nongdie madan” la ong u bah Paul.
U bah Paul ula ong ban pyntikna ba hadien ba la khang ia ki kali ban rung ym dei pat ban mih bujli da ki nongshong madan bad ia kane la leh naka bynta ban pynthikna ba ki nongshong shnong ki dei ban long kiba koit ba khiah bad kumta donkam ban iaid hynrei haba iaid pat iaid khlem da tieng ioh shah tynrah ha ki kali ne shah tynrah ha u nongdie madan.
Ula ong ba watla yn nym shah shuh ban iaid kali na katei ka jaka hynrei yn ailad pat tang ia kito kiba sah ha katei ka jaka daka pynbiang iaki Car Pass bad ula iathuh ruh ba ka sorkar pyntip ruh ba mynta ki la pynkhreh wat ban mana ban pynpah Horn ha kylleng ki bynta ba kongsan kiba don ha nongbah Shillong.
