Shillong, Iaiong 10 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi Nyngkong, ula pynpaw ba kam don satia ka jingtip ba thikna ba ki Sengbhalang kila pynthut ia ka jingtrei jong ka project surok Shillong-Dawki.
“Ngam pat don jingtip ia kane. Hynrei lada donkam, ngan ong ha phi ha ka kyrdan jong nga ba nga lah ban khot ia ka jingialang bad kine ki Sengbhalang lada ngi don ki jingujor na ka kompani ba pyntrei ia kane ka project” ong u Bah Prestone haba iakren bad ki nongthoh khubor.
Kane ka jingkren jong u kala mih halor ka hukum ba dang shen jong ka Iingkashari Meghalaya High Court, kaba bthah ia ka jingdonkam ban tehlakam ia ka jingwan mushlia jong ki Sengbhalang khnang ban lah pyndep shaid shaid ia ka project surok Shillong-Dawki.
U Bah Prestone ula pyntip pat ba ka project kala iatakhuh bun ki jingtynjuh bad ong “War ki trai jaka kiba ngi hap ban pynkohnguh, iakren bad ki, ka shim por bha ban leh namar ka riti bat khyndew kaba ngi don ha Jylla ka iapher bak ly bak…ta ka daw ngi hap ban iakren bad baroh ki kynhun”.
“Hynrei wat ki Sengbhalang ki hap ban sngewthuh ba kane ka surok ka dei ka jingim jong ka Jylla kaba ka surok na Dawki sha Shillong ka long kaba kongsan bha na ka bynta ki nongshangkai pyrthei bad wat ha ka khaii ka peteng kaba iaid mynta. Ngi donkam ban pyndep ia kane ka project kham kloi kat kaba lah” ula bynrap.
