Shillong, Iaiong 06 : Ki Pulit ka East Khasi Hills, kila kem ia lai ngut ki dkhot ka seng Hynniewtrep Achik National Movement (HANM) halor ka jingbyrngem ia ki nongwan shangkai pyrthei bad ia u trai jong ka Guest House ha Mawdiangdiang.
U Superintendent of Police ka East Khasi Hills Bah Sylvester Nongtnger u pyntip hynne ka sngi Palei ba katto katne ki dkhot ka HANM kila leit sha ka Miracle Spring View Guest House kaba don ha Mawdiangdiang ha ka step 3 tarik Iaiong bad kila byrngem ia ki Nongwan shangkai pyrthei ba wan sah ha kane ka Guest House.
Kine ki Nongwan shangkai pyrthei kila wan kai ban pynlut por arsngi ha Meghalaya na ka bynta ban leit jngoh ia ki jaka leh niam bad ruh ban leit jngoh kai ia ki sawdong sawkun.
U ong ba ki dkhot ka HANM kila byrngem ban leh tyngeh ia u trai jong ka Guest House , kaba la pynrit mynsiem bad pynsngew syier ia u trai lem bad ki nongwan shangkai.
Halor kane, ki Pulit kila register ia ka case ha Rynjah Police Station bad hynne ka sngi, laingut na kine ki dkhot kila shah kem, ong une u heh Pulit.
Ha kajuh ka por, u SP ula maham ia baroh ba kim dei ban shim ia ka ain hala ki jong ki kti da kaba pynthut ia ka jingwan jong ki nongshangkai sha ka Jylla.
Pule lang ia kane: Phah shithi ka VPP sha u CM ba dawa ia ka Dorbar Kyrpang ban iatai ia ka Reservation Policy
