Guwahati, Iaiong 06: U Myntri ka tnat Animal Resource Development(ARD) ka Tripura u Sudangshu Das hynnin ka sngi u la pyntip ba ka sorkar jylla ka la khang pyrshah ha kaba iadei bad ka jingpynpoi sniang na shabar ka jylla shibynta ki lad jingiada namar ka jingsyier na ka jingsaphriang jong ka jingpang sniang ba la tip kum ka ‘swine flu.’
“Lada lap ia kino kino kiba pynkhein ia kane ka jingshim rai jong ka sorkar kin ngat ha ka jingshah pynshitom.Halor kane la pynjari ruh a ki kyndon kiba khang pyrshah khnang ba lada lap ia kiba pynpoi sniang beain sha Tripura, na ka liang ka tnat kan shim da ki lad jingpynshitom kiba tyngeh,” ong utei u myntrai.
Ki sniang kynthup naduh ki sniang khun na ka thain shatei lammihngi (Northeast) kumjuh na ki jylla ka thain shathie bad ka thain shatei jong ka ri ki la shah ktah ha kane ka jingpang bad kine ki dei ki thain kiba ka jylla ka ju pynpoi ia ki sniang na kitei ki jaka kiba shah ktah ha kane ka jingpang ‘African Swine Flu.’
Kane ka jingpang ASF kaba khlain ka jingiabit ka la ktah borbah ia ki bynta jong ka jylla Mizoram ha ki snem 2021 bad 2022 ha kaba la hap ban pyniap ia haduh kumba 33,400 tylli ki sniang bad kaba la ktah ia kumba 10,000 tylli ki longiing bad kaba la wanrah ka jingduh nong kaba ka kot haduh kumba T.61 klur.
Katkum ki riew shemphang, ka jingsaphriang jong kane ka jingpang ASF ka dei lyngba ki sniang ne ka doh ba la thied na ki bynta jong ki ri ba marjan jong ka Myanmar, Bangladesh bad kiwei pat ki jylla ka thain northeast.
Lah ban kdew ba ka kam khaii sniang hapoh ka thain northeast ha ka shisnem ka kynjoh haduh kumba T.8,000 haduh 10,000 klur ha ka shi snem ha kaba ka Assam kadei ka nongshalan kaba wan ha ka kyrdan kaba hakhmat eh.
