Shillong, Iaiong 03: Ka seng Bharatiya Janata Party (BJP) kala pynpaw ba ki don 3 tylli ki daw ba ka seng kam shym la lah ban leh bha haka elekshon MLA kaba dang shu dep ha ka jylla.
Haba iakren bad ki nongthoh khubor hadien ba la wai ka jingialang, u President ka BJP Bah Ernest Mawrie ula ong, ka jingkynnoh ba ka seng kadei kaba pyrshah ia ki Khristan kadei kawei na ki 3 tylli ki daw, ba ka seng kam shym la lah ban jop bun ngut haka elekshon MLA.
“Baroh ki dkhot jong ka iingdorbar thawaiñ kila rah ia katei ka mat haba la jan ka elekshon sa 4-5 bnai eiei, kane ka jingkynnoh pyrshah Khristan kala mih ruh ha ki lad pathai khubor ne haki Whatsapp Group ba ka BJP kala leh kumne kumtai hynrei balei ym shim la kren pat baroh shi snem ia katei” ong u Bah Mawrie.
“Ki nongialam ki jong ngi naduh u Amit Shah, ngi la pynlong ia ki jingialang bad ki nongialam niam. Wat u National President ha ka por ba u pyllait iaka manifesto ula khot sngewbha ia ki nongialam niam bad ia bam ja lang bad u. Na ka por sha ka por, ki nongialam kiba hakhlieh ki jong ngi, ki Myntri ka sorkar pdeng, ki ju leit ban iakynduh ia ki Bishop bad Pastor ban weng iaka jingshah kynnoh ba ngi long pyrshah ia ki Khristan” la ong u Bah Mawrie.
Ha kawei pat ka liang ula ong, ka daw ka baar, kadei halor ka jingbym ioh lad ka seng ban pynkhlain iaka seng ha ki shnong ki thaw namar ka jingsaphriang ka khlam COVID.
“Nga la shimti kum u President ha u 2020. Nga la ioh por tang shi bnai ban treikam bad kala wan noh ka jingkhangdam. Kane kadei ka dawbah ba ka jinglong jingman jong ka seng ha ki shnong ki thaw kam shym la long kaba biang haduh katta katta” ula ong.
“Ka balai ka long, watla ka sorkar BJP kala ai iaki skhim ki bapher bapher sha ki paidbah ka jylla kum ka jingioh iaka free gas connection, free rice, PM Kisan, JJM bad kiwei kiwei ki skhim hynrei ia kane ka nam la kam trai noh da kiwei pat ki seng saiñ pyrthei, ia kaba ngam kwah ban pynpaw iaka kyrteng” la ong u Nongialam ka BJP.
Ula ong ka BJP kala pynlong 59 tylli ki jingialang paidbah ha ka por elekshon ha kaba wat u Myntri Rangbahduh ka ri ula pynpaw iaka jingkmen bad ka rukom treikam jong ka seng bad ka jingwan iashimbynta ki paidbah ha kitei ki jingialang. Ki paidbah kila wan bha ban sngap ia ka jingialang hynrei ngim shim la lah pat ban pynkylla ia kitei ki paidbah sha ka vote kaba ngin ioh bad ki paidbah ka Meghalaya kim shym la jied ia ka BJP.
Haba kylli, la ka don kano kano ka jingthmu ban weng noh ia u kum u President ka BJP Meghalaya Unit, u Bah Mawrie ula ong, “Ia kane nga ieh beit ha ka seng ba kan shim ia ka rai. Lada ka seng ka sngew ba ka samoi treikam kala kut, kumta kin rah skong noh da uwei pat ban longkum u President, kam don kano kano ka jingma namar ngam lah hi ruh ban shong shirta kum u President”
“Katkum ka riti synshar ka seng, ka samoi treikam ka long 3 snem hynrei kan shong pat ha ka rai jong ki nongialam kiba ha khlieh jong ka seng bad ngam don kano kano ka jingeh ban hiar shuki ruh” la ong u Bah Mawrie.
Ka samoi treikam jong u Bah Mawrie kala kut noh ha u Bnai Rympohang mynta u snem.
Ula ong ba iaka samoi treikam jongu national president ka BJP u JP Nadda la dep ban pynjlan haduh u Naitung 2024 bad kum katei kajuh ka rail ah ban shim da ki nongialam kiba hakhlieh jong ka seng na ka bynta ki jylla ruh hynrei kila don pat ha kiwei ki jylla ba la dep ban bujli noh ia u president.
Ha kawei pat ka liang u Bah Mawrie ula ong, baka seng ka iengskhem beit ha kajuh ka nongrim ban pyrshah beit ia ki kam bamsap watla ka donlang hapoh ka sorkar synroplang MDA-II.
“Ngi leit ban ai jingkyrshan ia ka sorkar namar ba ngi kwah ban ioh iaka sorkar kaba skhem. Ngim kwah ban iohi kum ka seng saiñ pyrthei ba ki paidbah ka jylla kin mad ia ki jingeh jingshitom” ong u President ka BJP Meghalaya bad ka ong, ba ka long kaba dang kloi palat ban batai eiei ia mynta hi, iaka rukom treikam jong ka sorkar MDA-II.
