Shillong, Lber 31 : Ka Achik Conscious Holistically Integrated Krima (ACHIK) hynne ka sngi Thohdieng, kala kyntu ia ka Voice of the People Party (VPP) ba kan rah iakren ruh ia ka kam ba iadei bad ka jingbuh ia ka Winter Capital (Nongbah Tlang) ha Tura bad kumjuh ruh ban rah ia ka Additional Secretariat bad ki Khlieh jong ki Ophis bad ki Tnad sha Ri-lum Garo.
“ Kane ka sienjam kan pyni shisha ba ka VPP kam dei ka party ba don ia ka mynsiem sngewpher jaidbynrriew, hynrei kaba kwah ia ka jingiashongsuk bad ia ka bha ka miat jong baroh ki jaidbynriew ha ka imlang sahlang ka Jylla” ong u Greneth M Sangma, Vice President ka ACHIK ha ka kyrwoh.
Ula kynthoh ia kane halor ka jingpynmih khubor ka VPP ba ka party kam don satia ia ka jingsngew iapher jaidbynriew.
“Ka jingkyntu ka ACHIK ka dei kaba kongsan namar ka kren halor ka jingkongsan ka jingiashongsuk hapdeng ki jaidbynriew ha ka sain hima sima. Ha ka Ri ba iar kum ka India, kaba ki briew na ki niam bapher bapher bad ki jaidbynriew bapher bapher ki ia imlang, ka long kaba kongsan ban don ia ki Nongialam kiba don jingmut shisha na ka bynta ka bha ka miat jong baroh ki jaidbynriew ha ka imlang sahlang” ula ong.
Pule lang ia kane: Hapoh u Jylliew yn pyndep ia ka jingmaramot ia ka Jowai bypass : pyntip ka Sorkar ha Iingkashari
Haba pynpaw ba ka seng sain pyrthei kaba shim kongsan eh ia ka bha ka miat tang jong kawei ka Jaidbynriew ban ia kiwei, ka lah ban wanrah ia ka jingiapait iapra bad ka huri hura kaba lah ban ktah ia ka jingkiew shaphrang ka Ri, u Sangma ula ong “Namar kata, ka long kaba donkam ia ki seng sain pyrthei ban buh hakhmat ia ka jingiashongsuk hapdeng ki jaidbynriew bapher bapher bad ban trei na ka bynta ka jingbha jong baroh. Kane ka dei kaba lah ban pynurlong lyngba ki lad bapher bapher, kum ka jingbuh ia ki Institution bad ki jingtei ha ki jaka ba sahdien, ailem kajuh ka lad sha baroh, ban pynthikna ia ka jingiada halor ka hok jong baroh ki jaidbynriew”.
U Sangma ula bynrap “Ka ACHIK ka kyrpad ia ka Winter Capital ha Tura bad ka jingpynkynriah ia ka Additional Secretariat bad ia ki Khlieh jong ki Ophis/Department sha Ri-lum Garo ka dei ka sienjam ha ka lynti kaba dei ha kaban ioh ia ka jingia shongsuk hapdeng ki jaidbynriew bapher bapher. Kine ki sienjam kin ym pynmyntoi tang ia ki paidbah ka Ri-lum Garo hynrei kan pyni ruh ia ka jingkitkhlieh jong ka VPP na ka bynta ka bha ka miat jong baroh ki Jaidbynriew”.
Haba niew ia ka kam jong ka Reservation Policy kum ka kam ba jyrwit jyrwat bha, u Sangma ula ong ba ka long kaba donkam ba ki MLA ka VPP kin bishar ia ka jingshisha bad ka jingtuklar jong ka Iingkashari High Court halor ka jingthung kam thungjam.
“Lada kam don ka jingleh bymhok, balei pat ba ka Iingkashari ka hap ban tuklar?. Ka lah ban long ba ka don ka jingbym biang ha ka rukom pyntreikam ia ka Reservation Policy, kaba lam sha ka jingtuklar jong ka Iingkashari. Kane ka pynmih ia u dak jingkylli halor ka jingtreikam hok jong ka policy thungkam” ula ong.
Pule lang ia kane: Hap tohkit biang u District Judge ba mih ka jingkynnoh siew tam ia ka bai jaka ha Umroi
