Shillong, Lber 29 : U Myntri Rangbah ka Jylla Conrad K Sangma hynne ka sngi Ba-ar, ula pynbna ba ka Jylla kan ym lah ban kiar na ka jinghap pynlip bording namar ka jingduna ka bording hynrei kular pat ba ka Sorkar kan pyrshang ban pynduna ia ka por pynlip na ka bynta ka bit ka biang u paidbah.
U Conrad ula mynjur ba kala kham biang ha ka liang ka jingpynmih bording mynta u snem namar ka Jylla kam pat mad ia ka jinghap pynlip bording ha u bnai Rymphang bad Lber, ym kum ha kiwei kiwei ki snem. U Myntri Rangbah ula ainam ia kane ka jingkham janai ha ka sienjam ban pynjanai ia ka rukom treikam ka Tnad bording, kaba la shim da ka Sorkar ha kine ki arsnem bala leit noh.
Watla kala kham biang, hynrei ka dang don bun bah ka jingduna ha ka bording ia kaba hap ban leh eiei. Namar kane, ka Sorkar kala hap ban pyntreikam ia ka jingpynlip bording hynrei kan pyrshang ban pynduna ia ka por kat kaba lah na ka bynta ka bit ka biang u paidbah.
“Ngin pyrshang ban pynduna kat kaba lah. Ngin pyrshang ban leh ha kata ka rukom ba kano kano ka jaka kan nym shah pynlip bording bunsien ha ka shisngi” ula ong.
U Myntri Rangbah ula ban jur ba ka Sorkar kan peit thuh ruh ia kiba bun ki nongrim haba pyntreikam ia ka jingpynlip bording kum ka jinglong jingman ka suinbneng, ka jingpynbeit ia ka por bad kiwei kiwei.
Pule lang ia kane: Kyntait ki Hospital ka Jylla ia ka jingbuhdor ka CGHS
