Itanagar, Lber 24: Ka Enforcement Directorate (ED) ha ka sngi ba Ar ba la lah ka la pynlong ka jingkhynra ha ki ar jaka hapoh Itanagar ha kaba iadei bad ka bamsap na ka jinglaittuh ka jingkylli eksam ba la pyniaid da ka APPSC.
Katei ka tnat ka la pynlong ruh ka jingkhynra hapoh ka iingsah jong u Taket Jerang uba la shah kynnoh donkti hakhmat eh ha kaba iadei bad kane ka jinglaittuh ka jingkylli. U Jerang u la shah pynngat ha baroh ki kam bymman kiba iadei bad ka jingtreikam jong ka APPSC naduh u snem 2014.
Ka ED ka la pynlong ruh ka jingkhynra hapoh Papum Pare district hapoh ki kyndon jong ka Prevention of Money Laundering Act, 2002.
Lyngba ka twitter ka ED ka la ong ba ka la pynlong ia kane ka jingkhynra hapoh jong kitei ki kyndon jong ka PMLA, 2002, ha Papum Pare district ha kaba iadei bad ka jingtohkit halor ki kam bamsap lyngba ki lad aikam aijam jong ka Arunachal Pradesh Staff Selection Board (APSSB) bad ruh halor ka bamsap na ka jinglaittuh ka jingkylli eksam ba la pyniaid da ka Arunachal Pradesh Public Service Commission (APPSC).
Ka ED ka la kurup shibun ki kot ki sla ha kane ka jingleit khynra bad kurup ruh ia ki bank account bad ki FDs kiba kot sha ka T.1.41 klur.Nalor kata ia ki account jong ka Kapter Ringu lem bad kiba haiing hasem ki jong ka la kurup noh da ka ED ha kaba iadei bad katei ka jinglaittuh ka jingkylli APSSB.
Ka Special Investigation Cell, kaba la pynlong ia ka jingtohkit halor ka bamsap lyngba ka jingaikam ai jam hapoh ka APSSB ka la ujor pyrshah ia ki 19 ngut ki briew ha u bnai Naiwieng 2020 halor ka jingshah kynnoh donkti ha katei ka kam bamsap.
