Shillong, Lber 24 : U Myntri Rangbah ka Jylla Conrad K Sangma hynne ka sngi thohdieng, ula ong ba ka jingthung ia ki Consultant ka dei kaba hap ban leh (mandated) na ka bynta ban pyntreikam bha ia ki project ba bei pisa na shabar (Externally Aided Project) bad ki kam kiba iadei bad ki Ministry bapher bapher jong ka Jylla.
Haba kylli halor ka jingdonkam jong ka Sorkar ban thung bad pynlut bun bah ka pisa sha palat 161 ngut ki consultant, u Conrad ula ong “Ki kam jong ki Ministry bapher bapher na ka Sorkar India kum ka PMGSY, Smart City Project, bad kiwei ki Tnad kiba don, kila bthah ba dei ban thung ia ki Consultant. Kam dei kaba lah ban jied, ka dei kaba hap ban leh beit”.
“Wat ki project ba bei pisa na shabar kiba iaid mynta, la bthah ba dei ban don ki consultant ia ki kam bapher bapher kiba hap ban pyntrei ha ki Tnad bapher bapher, Ministry” ula bynrap.
U pyntip ba ka Sorkar kala pynlut T.250 klur na ka bynta ki consultant ha kine ki san snem kaba mut T. 50 klur ha ka shisnem.
Pule lang ia kane: Pynshai u CM ba pynsangeh u Lamphang ia ka Dorbar kat kum ka Rule
“T.250 klur lehse lah ban sngew ba kala heh bha hynrei lada phi khein ia ki snem, bnai bad ka jingdon ki project kiba iaid, ka long la kumno kumno tang T. 20 lak shibnai bala pynlong da kawei na ki Tnad kiba pyntrei ia ki project” ong u Conrad.
Shuh shuh, u Myntri Rangbah ula pyntip ba ia ki consultant la thung na ka bynta ki project ba T.16,000 klur kumba la bthah da ki Ministry bad EAP (Externally Aided Projecr). Na kane, T. 12,000 klur tam ka dei ka EAP, T. 1000 klur ka dei ka Smart Town Project, T. 3000 klur ka PMGSY bad kiwei kiwei.
Nalor kane, u Conrad ula ong ba ka jingpynlut ia ki consultant ka wan na ka EAP ym na ka pla tyngka ka Sorkar. “Ka dei shibynta jong ka project bad ruh ka long kumjuh ia ka Smart Town Project bad ruh ia ka PMGSY.Hynrei kaba sngewtynnad ka long ba bun na kane ka jingpynlut kam kot ia ka 5% bala buh kyndon (kaba hap ban pyndonkam naka song pisa bala mang sha ki project ia kiba dei jong a EAP). Ka kham duna ia kane” ula ong.
