New Delhi, Lber 24 : U Nongialam ka Congress Rahul Gandhi, ula shah mait kyrteng na ka jinglong Dkhot ka Iingdorbar Lok Sabha (MP) hadien ba ka Iingkashari ha Surat, hynnin ka 23 tarik Lber, kala pynngat ha ka jingpynsajia ia u halor ka mukotduma bai mynrain khmat naka jingkynthoh pyrshah ia ka “Jait Modi”.
“U Rahul Gandhi, Member ka Lok Sabha ba mihkhmat ia ka Wayanad Parliamentary Constituency ka Kerela, ula shah mait kyrteng na ka jinglong dkhot ka Lok Sabha naduh ka sngi ba pynngat ha ka jingpynsajia ia u kata ha ka 23 tarik Lber, 2023 kat kum ka kyndon jong ka Article 102 (1) (e) jong ka Riti Synshar ka Ri pule lang bad ka kyndon 8 jong ka Representation of People Act, 1951” ong ka notice bala pynmih da u Utpal Kumar Singh, Secretary General ka Lok Sabha Secretariat hynne ka sngi thohdieng.
U Rahul Gandhi ula shah pynngat ha ka jingpynsajia hynnin ka sngi Palei ha ka mukotduma bai mynrainkhmat namar ka jingkynthoh ia ka ‘Jait Modi” bad la hukum ban set phatok ia u haduh arsnem.
Ka Iingkashari kala mynjur ban ai jamin ia u bad pynsangeh ia ka hukum haduh 30 sngi ban ailad ba un leit mudui pyrshah ha ka Iingkashari ba kham halor. Kane ka mukotduma ka dei kaba la tian bishar halor ka jingujor jong u MLA ka BJP Purnesh Modi namar ka jingkynthoh u Rahul Gandhi ia ka Jait jong u da kaba ong “Kumno ba baroh ki nongtuh ki don ia kajuh ka jait kata ka jait Modi”.
