Shillong, Lber 24 : U Myntri Rangbah ka Jylla Conrad K Sangma ula pynpaw ba ka Sorkar Meghalaya kam pat ioh satia ia ka No Objection Certifictae (NoC) na ka Khasi Hills Autonomous District Council (KHADC) ba iadei bad ka lynti rel sha Shillong.
U Myntri Rangbah ula pyntip ruh ia ki lad pathai khubor ba u dang iakren bad ka Ministry of Railways. Ka Sorkar India, bad kyrpad ba ka donkam ban pynlong shuwa ia ka jingiasyllok bad ki kynhun bapher bapher shuwa ban shim ia kano kano ka sienjam.
U Conrad ula ong ba ka jingiakren bad ki Kynhun bapher bapher ka long kaba donkam shuwa ban shim ia kano kano ka rai halor ka lynti rel sha Shillong. Namar kata, ka Sorkar ka donkam ban iasyllok bad shim ia ka jingkyrshan jong ki Kynhun bapher bapher.
U Myntri Rangbah ula ban jur ruh ba donkam ia ka por ban iakren ia kine ki kambad ki bad hadien ba kila poi sha ka jingiasngewthuh jingmut, ki lah ban pyniaid shakhmat ia ka kam.
Pule lang ia kane: Pyntip u DyCM : Lah dep pynkhreh iaka Blueprint ban weng ia ka jingkhapngiah ka Shillong
Nalor kane, u Myntri Rangbah ula pyntip ruh ba ha Byrnihat, kii don katto katne ki jingsngewkhia kiba mih bad ka Sorkar Jylla ka dang iakren bad ki kynhun bapher bapher.
Hynrei, ban kyntiew ia ka ioh ka kot ka Jylla, u Myntri Rangbah ula ai jingmut ba ki lah ban sdang shuwa da ki rel kit mar. Kane kan iarap ia ka pla tyngka ka Jylla bad ka rel kit mar ka dei kaba ngi lah ban sdang shuwa ka rel kit briew.
U Myntri Ragbah ula pynpaw ruh ba u Myntri Rangbah Duh Narendra Modi u don ka jingshngewkhia bad ukwah ban iohi ba baroh ki Nongbah jong ki Jylla kin dei kiba iasoh da ka lynti rel na ka bynta ka bit ka biang jong ka Ri, ban pynthikna ia ka jingkiew irat ka ioh ka kot.
Haba mynjur ia ki jingmyntoi ban pyniasoh ia baroh ki Jylla bad ki Nongbah da ka lynti rel, u Myntri Rangbah ula kdew ruh ia ki jingeh kiba mih ha kawei pa kawei ka Jylla. Ha Meghalaya, ka lynti rel ka dei ka kam kaba jyrwit jyrwat bha bad bun ki Seng bad Khlieh Nongsynshar kila pynpaw ia ka jingsngewkhia halor ka jingrung kyrthep ki briew ba nabar Jylla. Namar kata, ka long kaba kongsan ban shim shuwa ia ka jingmynjur lang jong baroh, ula ong.
