Shillong, Lber 24 : U Symbud Myntri Rangbah ka Jylla ba khmih ia ka Tnad Home (Police) Bah Prestone Tynsong, hynne ka sngi Thohdieng, ula pyntip ba ka Tnad kala pynkhreh ia ka Blueprint ne ka Plan ban weng ia ka jingkhapngiah ka Shillong bad ruh ban pynduna ia ka jingdheng kali.
Ula pyntip ha Iingdorbar ba ka Sorkar Jylla kala shim ia ki sienjam kiba bun ban tehlakam ia ka jingdheng kali bad ban pynkylluid ia ka jingiaid ki kali bad pynsuk ia ka leit ka wan ha Nongbah Shillong.
Ka Sorkar Jylla kala leh ia ka Technical study, Integrated Network Planning bad kiwei kiwei ban sngewthuh ia ki daw tynrai.
“Da kaba pynshong nongrim halor kane bad ka jingai jingmut na ki Tnad bapher bapher, la pynkhreh ia ka blueprint ban pynkylluid ia ka Shillong, ki sienjam ban hap shim mynta bad hadien habud na ka bynta ban pynduna ia ka jingdheng kali” ong u Bah Prestone haba jubab ia ka jingkylli bala wanrah da u MLA ka AITC na Nongthymmai Bah Charles Pyngrope.
U Bah Prestone ula pyntip ba ka Sorkar kala thaw ia ka Committee jong kiba bun ki Tnad ia kaba la khlieh da u Chief Secretary bala ai kyrteng ka Shillong Decongestion Committee, ka ban peitngor ia ka jingiaid ki sienjam bala buh ban shim kat kum ka blueprint.
Ka Committee kala pynlong ia kiba bun ki jingialang ban peit thuh ia ka jingiaid ka kam.
Pule lang ia kane: Pyntip u CM ba ka UCC ka dei ka Bill shimet
Ka Sorkar Jylla kala shim ruh ia ki jingai jingmut na ki jaka pule bad Tnad ba paw kum ka IIM Shillong, NIT Shillong bad ka North East Space Application Centre (NESAC).
Katto katne na ki sienjam bala shim da ka Sorkar ka dei ka jingwanrah iaka Shared School Bus, pyntreikam pyrrkhing ia ki ain ki ban pynthikna ia ka jingneh bad jingbha jong ki surok.
Haba kdew ia ki sienjam ba mardor bala shim ban weng ia kane ka jingeh, u Symbud Myntri Rangbah ula ong ba iaki Shared School Bus la pyntreikam hapoh ka Nongbah. La antad ba kumba 450 tylli ki kali kin lait na ka jingmih sha surok ha ka por leit buh bad shaw skul.
Ula ong ba ka Sorkar kala buh hakhmat eh ban kyntiew kyrdan ia ki jaka pynieng kali bad ki surok ban lah pyndonkam kat kum ka jingdawa. Ula iathuh ba ia mynta, palat 300 tam ki jaka ban pynieng kali la nang pynbun hapoh ka Nongbah.
“Ka Sorkar kala pyntreikam ruh ia 30 tylli ki bos elektrik kiba pyniasoh ia ki jaka iew, ki Ophis treikam, ki jaka pule bad ki shnong briew” ong u Bah Prestone haba bynrap ba kine ki bos kin iaid ha ka 30 minit kawei hadien kawei, ia ka ban sa pynduna sha ka 10-15 ha ka bynta bynta, ha kine ki surok ba la buh ba kin iaid” ula ong.
Haba iadei bad ka sienjam ba hadien habud, u Symbud Myntri rangbah ula ong ba ka jingshna ia ka surok Shillong Western By-pass bad ka jingpynheh ia ka Shillong Eastern By-pass bad kiwei kiwei ki surok, kin sa nang iarap ban pynduna ia ka jingkhapngiah.
Ula ong ba ka Sorkar Jylla kala rai ban pynkynriah ia ki Ophis treikam sha ka New Shillong Township ha kaba baroh ki Ophis Sorkar kin sa don noh ha kane ka jaka. Kane kan iarap ban pynduna ia ka jingdheng kali ha kane ka sor.
