Tura, Jylliew 30: Ka kynhun ki nongtuh masi na Assam, kila shah syngngeit ha ban da jem jai ha ki paid nongshongshnong ka Ri-lum Garo hadien ka jingioh kem ryngkat bad ki masi ba tuh hynne ka step sngi palei naka shnong Damalgre.
“Kane ka jingjia kala jia ha ka shnong Babalgre kaba hap hapoh ka Damalgre Police Station bad la ioh ban kurup noh ia lai tylli ki masi ba shah rong tuh” ong u Superintendent of Police ka South West Garo Hills u S Ambedkar.
U Trai jong ka masi na Balagre ula shem ba lai tylli ki masi jong u, kila jah naka sem kaba don shabar ka Iing ha ka por 3 baje mynstep. Mar mar ula pyntip sha ki nongshongshnong bad ryngkat lang kila pynlong ia ka jingiawad paidbah.
Ha kane ka jingiawad, kila lapdien ia ka lynti iaid jong ki masi sha kawei ka jaka khlaw bad daka jingbuddien ia ki, kila iakynduh pynban ia lai ngut ki briew ba shong ha kawei ka trok kaba ieng ha kane ka khlaw.
Kine ki briew haba nyngkong, kila kam baka kali jong ki kala duh bad ba kila sah miet noh ha kane ka jaka hynrei dei haba ki paidbah kila leit jngoh shadien,kila lap pynban ia kine ki masi bala dep thep hapoh.
Halor kane ka jingshem, ki paidbah kila teh ia kine ki briew bad kila syngngeit haduh ba kin da jem jai.
Haba ioh jingtip ia kane ka jingjia, ki Pulit na Damalgre Outpost kila mareh wut wut sha kane ka jaka bad kila shimti noh ia kine ki nongtuh masi bad pynkut sha ki hospital ba marjan ba kin ioh jingsumar.
Ki Pulit kila kurup noh ia ka trok bad ia ki masi pat la pynphai noh sha ki trai hadien bala pyndep ia baroh ki kam kiba donkam.
