Shillong, Lber 15: Ka sorkar synroplang MDA-II kala pynkhreh ban phah biang da u Timothy D Shira ban iakhun iaka elekshon Deputy Speaker jong ka iing dorbar thawain ka jylla kaban long ha ka 20 tarik mynta u bnai.
Katkum ki tyllong khubor kiba la iohlum la iathuh ba ka sorkar MDA hapoh ka jingialam u Myntri Rangbah Conrad K Sangma, hadien ba kala dep ban iatai sani bha, kala shim ia ka rai ban pynieng hi da u Deputy Speaker barim ka jylla u Timothy na ka bynta katei ka kyrdan hapoh ka iingdorbar thawain ka jylla.
La iathuh ba ia kane ka rai la shim namar ba ha kine ki 5 snem kiba la leit, u Timothy ula bat kum u Deputy Speaker ha ka sorkar MDA-I bad kumta kila sngewdei ban pynneh biang ia u ha katei kajuh hi ka kyrdan khamatam haba ka kynhun MDA ka don iaka jingbun paidbah hapoh ka iing dorbar.
Haba phai pat sha kiwei ki seng sain pyrthei kiba don ha ka liang pyrshah kiba kynthup iaka AITC, Congress bad VPP ym shim la ioh jingtip la kin pynieng ne kin ym pynieng kyrtong ban iakhun iaka elekshon Deputy Speaker.
