Shillong, Lber 15: Ka jylla Meghalaya kala pynlong iaka 31st International Cave Expedition lyngba ka project ‘Caving in the Abode of the Clouds’ kaba la long ha ka 6 tarik haduh ka 24 tarik u Rymphang mynta u snem ha ka thain Muallian, East Jaintia Hills District.
Ka kynhun jong ki nongrung krem ka kynthup na ka ri UK, Switzerland, Ireland bad kumjuh ruh ki dkhot jong ka Association.
Kitei ki nongrung krem kila leit ban rung ia ka Krem Rynjang (Retdung Khur), Pynnoh Um Sngad bad Ram Khur.
Ia ka Krem Pynnoh Um Sngad la bteng ban pynjlan iaka jingjrong jongka jingleit rung krem kata na ka 5295 Metre ha u snem ba ladep sha ka 7,831 Metre bad la leit ban pyniasoh sha ka Ram Khur, da kaba pynlong iaka rukom rung krem da ka (Pynnoh Um Sngad-Ram Khur) kaba don iaka jingjrong kaba kot 14,951 Metre kaba long ka ba 7 hapoh ka ri India ha ka jingjrong jong ka krem.
Ka Krem Rynjang la dep ban pynjlan sha ka 4,117 Metre bad ka jingjrong jong kane ka krem mynta kala long 20, 445 Metre kaba la pynlong syndon ia kane ka krem ba kan wan kaba 5 hapoh ri India bad ki dang don ruh ki katto katne ki bynta jong katei kakrem ka ba ym pat lah ban iaid ne wad lut.
Ka jingrung krem mynta u snem ka long kaba eh bad kaba jynjar bha namar ba ki krem ki long kiba khongwaiñ bad ki don ruh ia ki Entrance Shaft kaba palat 85 Metre bad ka jingrung krem ruh ka long kaba jylliew bha bad kala shim por haduh 3.5 Kynta ban poi sha ka bynta kaba kut jong ka jingsorjamin naka jaka ba rung.
U General Secretary ka Meghalaya Adventurers’ Association (MAA) u Bah Brian D Kharpran Daly ula ong ha ka jingrung krem mynta u snem la ioh ban rung ha ki jaka bad la pynwan dur iaka map kaba 6635 Metre jong ki jaka iaid ha ki krem kiba thymmai.
Ula ong, haduh mynta (Rymphang 24, 2023) kila don ia ki jingtip jong ki 1700 tylli ki krem bad ki jaka kaba ki don hapoh Meghalaya bad na kitei la dep ban rung ia ki 1100 tylli ki krem.
U Bah Kharpran ula ong, bad a kane ka jingrung krem mynta ka kynti ka jingdon jongki lynti ban rung bad ba la dep ban leh haka map haka jylla Meghalaya kala kot sha ka 537.6 Km ia kaba don dang ban hap wad bniah shuh shuh bad kane ka paw baka jylla Meghalaya kadei ka jaka kaba don bun bah ki krem hapoh ka pyrthei hi baroh kawei.
Ia kiba bun hi ki Krem la dep ban rung bad la dep ban leh iaka map ha kine ki 31 snem kiba leit naduh ki krem kiba don ia ki wah, ki krem kiba don ia ki lynti rung kiba itynnad, kiba khuid bad kumta ter ter ia kaba ym lah ban shem wat ha kiwei pat ki jaka.
Ka MAA kala pynpaw iaka jingsngewnguh iaka Directorate of Sports & Youth Affairs jong ka jylla bad ia ka Meghalayan Age Limited kiba la bteng ban ai jingkyrshan ia kaba yn ym lah hi ruh ban pynseisoh ha kaban buh ha ki jingthoh ia ki krem kiba don hapoh ka jylla.
