Shillong, Lber 15: Ka Dr. Anisha Mawlong kaba khlieh iaka HOD Radiation Oncology Department hapoh ka Cancer Wing jong ka Civil Hospital Shillong kala iathuh ba ka jingpang bampong (Cancer) ka jur bha hapdeng kito kiba dih duma.
Haba kren sha ki lad pathai khubor ka Dr. Anisha kala iathuh ba ka jingtei iaka Cancer Wing jong ka Civil Hospital Shillong ki la dep lut bad kiba dang sah ki dang don sa katto katne eiei hynrei watla kata ka jingai jingsumar kila iaid beit.
Ka Dr. Anisha kala iathuh ba ka Cancer Wing jong ka Civil Hospital nalor ba ka ai jingsumar iaki ba pang bampong (Cancer), ka ai jinghikai ruh kumno ban tehlakam ia ka jingpang bampong bad ban lap kham kloi daka eksamin iaki paidbah.
“Ka Ri india ka dei ka ri kaba nyngkong eh na kiba bun ki nongpang bampong lyngba ka jingdih duma bad ka jylla Meghalaya kadei kawei na ki jylla ba bun bha kiba ioh pang bampong bad kane ka kham bun napdeng kito kiba dih duma” la ong ka Dr. Anisha.
Ka Dr. Anisha ka la kam baka Meghalaya kadei ruh kawei na ki jylla ba jur bha ka jingdih duma bad kala donkam ka jingiatreilang na baroh ban ai jinghikai iaki paidbah khamtam iaki khun samla ban kiar na kino kino ki jait jingdih duma namar ka don ka jingma kaba khraw.
Ka iathuh ba kiba ioh thymmai ia ka jingpang bampong ha ka shisnem ki don haduh 1 hajar tam kiba la wan ban pynrung kyrteng bad ha ka shisngi katei ka jaka ai jingsumar ka don kumba 50 haduh 60 ngut kiba wan pynrung kyrteng thymmai.
Shuh shuh kala iathuh ba ka Cancer Wing jong ka Civil Hospital Shillong ka la ai jingsumar bad jingshakri kaba pura ia ki nongpang hynrei kaba dang sah ka long tang ban kyntiew ha ki katto katne ki liang ai jingsumar.
