Tura, March 10: U Dr. Crystal Cornelious D. Marak ula shah jied ban long kum u Dkhot sha ka General Council jongka Sahitya Academy, New Delhi ban mihkhmat iaka jylla Meghalaya.
U Dr Crystal udei u Assistant Professor ha ka Department of Garo, North-Eastern Hill University (NEHU), Tura Campus, Tura.
Ka samoi treikam jong ka General Council kan long naka bynta 5 snem kaba sdang naduh ka 1 tarik u Kyllalyngkot 2023 haduh ka 31 tarik u Nohprah 2027.
U Dr. Crystal Cornelious D. Marak ula dep ban pynmih ar tylli ki kot bad ula noh synniang bun tylli ki jingthoh sha ki lad pathai khubor bad udei ruh uba la ioh pdiang iaka State Literary Award halor ka jingthoh ia ka kot Novel kaba la ai kyrteng Sing•kam (2009) ha u snem 2012.
Nalor ka jingthoh ia ki Novel, u thoh ruh ia ki poetry, drama bad ki khana puriskam.
U dei ruh uba iahsimbynta bha ha ki kam kiba iadei bad ka imlang sahlang bad u dei ruh u dkhot ba pura jongka A•chik Literature Society, Garo Graduates’ Union bad kiwei kiwei.
Ula long teng ruh u Secretary jongka A•chik Literature Society, Tura, naduh u snem 2014.
Ka A•chik Literature Society kadei ka kynhun kaba la pynlong ia ki seminars, workshops khamtam ha kaba iadei bad ki jingtem tynrai bad ki jingshad tynrai jong ki Garo, ka jingpynlong ia ki rynsan jingialang na ka bynta ki nongthoh kot, nongthoh poitri bad kiwei kiwei ki jingialang da kaba iatreilang ryngkat bad ki jaka pule bad ki kynhun bapher kynthup iaka Sahitya Academy, New Delhi.
