Guwahati, Lber 09 : U Myntri Rangbah (CM) ka Assam u Himanta Biswa Sarma u la pdiang sngewbha ia ka syrnot ‘World Record’ halor ka jingdon bun tam ki jingthoh essay tang na ka bynta jong uwei u briew.
Ki nongmihkhmat na ka Guinness World Records Limited, UK ki la aiti ia ka syrnot sha u CM Sarma, ha ka jingrakhe ia ka lyngkhuh sngikha kaba 400 jong une u nongialam shipai jong ki Ahom u Lachit Borphukan.
Kane ka jingthaw rekod ka long halor ka jingdon haduh 42 lak tylli ki essay ba la thoh shaphang u Lachit Borphukan, uba dei u riew pawkhmat ha ka histori jong ka jylla Assam.Ia katei ka sienjam la sdang ha u bnai Rymphang 2022, kata ha ka jingrakhe ba shi snem kynthih ia kaba la wan plie da u president barim jong ka ri u Ramnath Kovind ha Guwahati na ka bynta ban leh burom ia utei u nongialam shipai jong ki Ahom.
Kane ka prokram ka thmu ban pynneh pynsah ia ka kolshor bad ka histori jong ka Assam.Shibynta jong kane ka jingkynmaw burom ia utei u riewshlur la tei ruh ia u dur mot rnong uba jrong 150 phut ia kaba la khmih lynti ba yn lah ban pyndep hapoh ka shi snem.
Nalor kata, ha u bnai Naiwieng ba la dep na ka liang ka sorkar ka la pynbna ia ka jingiakop thoh essay ka ban pynshlur ia ki briew ba kin pynpaw ia la ki jong ki jingsngew bad ki jingtip ha kaba iadei bad u Lachit Borphukan.Ka jingpynlong ia kane ka prokram ka la long kaba seisoh ha kaba ki la don haduh 42 lak ki essay ba la thoh da ki briew na ki bynta bapher baphr ka jylla bad ka ri kumjuh.
Na ka liang u CM Sarma u la pynpaw ia ka jingkmen ba ia ka dur phto album jong kine ki jingthoh ba la thoh da ka kti yn lah ban pynioh sha baroh ha ka jylla bad hapoh ka ri.Kane ka sienjam kan iarap ban pynneh pynsah ia ka burom jong u Lachit Borphukan bad kan pynshlur ruh ia ki pateng ki ban dang wan ba kin tip shaphang ka histori ba riewspah jong ka Assam.
