Shillong, Lber 9: U MLA ka North Tura bad MP barim ka Rajya Sabha Thomas A Sangma, ula shah jied kum u Lamphang ba 18 jongka ïing dorbar thawaiñ ka jylla khlem da donkam ban iakhun iaka elekshon lamphang.
Ka jingjop suk u Thomas iaka elekshon kadei hadien ba ki seng saiñ pyrthei kiba kynthup ia ka Congress, TMC bad Voice of the People’s Party kim shym la pynieng kyrtong haka elekshon Lamphang.
U Lamphang ba shipor jong ka ïing dorbar u Timothy D Shira, uba pyniaid iaka dorbar ula pynbna da kaba ong “Namar ba la ioh pdiang tang ia kawei ka kyrteng da ka ophis jong ka Iingdorbar ThawAin, Nga pynbna hangne ba u Thomas A Sangma un long kum u Lamphang”.
Haba ai jingkren hadien ba la jop ia ka elekshon Speaker khlem ka jingiakhun, u Thomas ula ai khublei ia ki dkhot jong ka dorbar kiba la jied ia u kum u Lamphang khlem kano kano ka jingpyrshah.
“Da ka jingsngewrit bad da ka jingsngew burom, nga shim ia ka shuki jong u Lamphang. Nga aiti ha ka jingstad jong baroh ki dkhot jong ka ïingdorbar kiba la shem ba nga long uba biang tam ban shim ia kane ka kyrdan” ong u Thomas Sangma.
Ula pynkynmaw ba ka ïingdorbar kadei ka jaka kaba ioh iaka jingithuh kum ka iing kaba don burom hapoh ka ri.
“Nga ngeit skhem ba ngin bteng ban pynneh iaka dustur ryngkat bad ia ki jingiatai nia kiba bha bad ba tei. Kumta nga kwah ban ailad ia ki jingiatai nia kiban mih ia ki resol kiba bha na ka bynta ban ioh ia ki polisi bad ia ki aiñ kiba bha. Nga khmih lynti ba ki dkhot kin iatai bha bad kin don ruh iaka mynsiem jong ka jingburom mar kylliang” ong u Lamphang.
Ula kyntu ruh ia ki dkhot ba kin ym pyndonkam ia ka bor jongki kum ki nongthawaiñ.
“Ngan ym long uba ia shah liang bad ngan long ruh uba skhem,kumta ngi dei ban mihkhmat ia u paidbah da ka jingdon burom bad kaba don jingmut bad ba kane ka Iingdorbar kan bteng ban im ha ka lynti ban tei iaka ri, ka roi ka par bad ka jingiatylli” ong u Thomas.
Hashwa kane, u Myntri Rangbah ka jylla u Conrad K Sangma ula pynpaw iaka jingskhem jingmut ba une u MP barim un lah ban pyndonkam hok iala ka shuki.
“Da ka jingdon ia ka jingshemphang, nga ngeit skhem ba phin lah ban pyndonkam hok iaka shuki Lamphang” ula ong.
Ula kren ruh iaka jingdonkam ban wanrah iaka jingkylla hapoh ka ïing dorbar thawaiñ ka jylla.
“Nga ngeit skhem ba ka jingshemphang ka jong phi ha kiba bun ki liang, phin lah ban wanrah iaka jingkylla hapoh ka ïing dorbar baroh kawei” ong u Conrad bad ka pdiang sngewbha ia ka rai jong u Lamphang ban pynlong ia ka jingai jinghikai ia ki MLA kiba dang shu dep shah jied thymmai.
Ki Lamphang barim ka jylla kiba kynthup ia u Bah Charles Pyngrope, Metbah Lyngdoh bad u AT Mondal kila ai khublei bad kitbok kitrwiang ia u Lamphang bathymmai ka jylla.
U Bah Charles ula ong, ba u Lamphang u dei ban ialam da ka jingstad ryngkat ka jingdon iaka jingsngewrit bad ka jingai iaka jingbishar kaba hok.
Ula ong, u Lamphang u don ia ka bynta kaba khraw bha ha kaban pyniaid iaka dorbar kaba don bun tylli ki seng saiñ pyrthei bad iaka sorkar synroplang.
“Ngi ngeit skhem ba da ka jingstad bad jingshemphang bad kum u nongialam uba khlain, yn rah shajrong ia ka jinglong jong ka iing dorbar kum kata kaba don ia ka akor bad ka burom” ong u Bah Charles.
Katba u Bah Metbah ula kyntu ia u Lamphang ba yn buddien ban shna pyndep noh ia ka jingtei ia ka ïing dorbar thawaiñ ka jylla.
Katba u Myntri Sorkar u Bah Paul Lyngdoh ula kyntu ia u Lamphang uba dang shu shah jied ban pynthikna ia ki dkhot “ba ki rung ha ka iing kaba kyntang ban ioh iaka jinghikai ym kum ka jaka kaba sop sop ban ia kamai bad uno uno uba pyrkhat ba kadei ka jaka ban ia kamai dei ban weng noh ia u”.
“Nga ngeit skhem bha naduh ka por ba phi shimti iaka shuki, phin law noh iaka jersey jong ka seng bad ban long u briew u bym don ha ka kam sain pyrthei. Nga ngeit skhem ba u nongialam jongka ïing bad Liang Pyrshah kin long lang kawei bad ban shah ialam ha u Thomas jong ka ïing u bym don iaka jingartatien” la ong u Bah Paul.
