Shillong, Lber 08 : U President ka People’s Democratic Front (PDF) Bah Gavin M Mylliem hynne ka sngi Balang ula ong ba ka jinglong nongmihkhmat kam mut satia ba hap ban long Myntri Sorkar.
Ula kren ia kane haba jubab ia ka jingbym ai bhah shuki Myntri u Myntri Rangbah Conrad K Sangma ia ka PDF ha ka kynhun Myntri.
U Bah Gavin ula ong ba ka PDF kam sngew mong satia halor ka rai jong u Conrad namar kala dier palat ban ai jingkyrshan ia ka Sorkar Meghalaya Democratic Alliance-2.
“Kum u Nongmihkhmat paidbah, kam mut eh ba hap ban long Myntri Sorkar hynrei ngi don hangne ban shakri ia ki paidbah ha kano kano ka bor ba ngi don” ula ong.
Ula ong ba ka PDF kala rai ban kyrshan ia ka Sorkar MDA-2 namar ka jingkyrpad jong u Myntri Rangbah ka Jylla.
Une u President ka PDF ula iathuh ba u Myntri Rangbah ka Jylla ua kular ban ai jaka ia ki MLA ka Party ha ka Sorkar Jylla. Ula ong ba kam shym la don satia ka jingiakren ban ai jaka ia ka party ha ka kynhun Myntri.
Haba kylli la ka party kala duh ia ka lad, u Bah Gavin ula ong “Ngi la slem ban ai ia ka jingkyrshan ia ka Sorkar. Jin ba ngi la ai jingkyrshan naduh kaba sdang, ngin jin da la iadonang ha ka kynhun Myntri”.
Ula ong, ka PDF kan ai ka jingiatreiang bad ka Sorkar na ka bynta ka jingkiew shaphrang jong ka Jylla.
“Ngin iai trei bad iai bteng ban pynsngew ia ki ishu ki ban pynjanai ia ka jingtreikam jong ka Sorkar na ka bynta ka bha ka miat jong ki paidbah ka Jylla” ula bynrap.
