Nagaon, Lber 08:Ki pulit ka Assam ha ka 6 tarik mynta u bnai ki la ioh ban kurup shibun bah u drok bad kem noh ia arngut ki briew kiba donkti na ki bynta jong ka Nagaon district ka Assam, ong ka khubor heh pulit.
Katkum ka khubor la ong ba ki bor pulit hadien ba ki la ioh ia ka jingtip kaba bniah ki la pynlong ka jingkhynra bad lapdien ia kawei ka kali sedan kaba don ia u registration number WB 02 AA 7211 ha ki bynta jong ka Jakhalabandha.
Hadien ba ki pulit ki la pynlong ka jingkhynra ia ka kali ki la lapdien ia u drok morphine uba don haduh 18.27 kilo bad u ba shongdor haduh kumba 9.13 klur.
Nalor kane ka jingioh kurup ki pulit ki la kem noh ruh ia arngut ki briew kaba kyntup ia u nongniah jong ka kali.
“Haduh mynta hi ngi la ioh jingtip ba kine kiba shah kynnoh donkti ki dei na ki bynta jong ka Basistha na ka sorbah Guwahati.Mynta ngi dang pynlong ka jingtohkit halor kane ka bynta bad halor ka jinglah ban donkti jong kiwei pat ha kane ka kam.Ia mynta hi kim don satia kino kino ki rekod kiba la dep pyrshah ia kine ki briew kiba la shah kem, watla katta ngi dang bishar bniah halorkane,” ong ka Superintendent of Police (SP) ka Nagaon ka Leena Doley.
Shuh shuh kane ka SP ka la ong ba na ka liang ki bor pulit ki la pan ruh ia ka jingiarap lem na ka tang Criminal Investigation Department (CID) ka Assam ha kaba iadei bad kane ka bynta.
