Agartala, Lber 08 :U nongialam ka Bharatiya Janata Party (BJP) u Dr Manik Saha mynta ka sngi u la shim smai kum u Myntri Rangbah (CM) ka Tripura ha ka kylla kaba ar ha ka jingiadon ryngkat lang u Myntri Rangbahduh (PM) Narendra Modi.
Ia ka jingialang pyntian smai la pynlong hapoh Vivekananda Maidan ha Agartala, bad ha kane ka jingialang la ia don lang ruh ki nongialam ba halor ka BJP kiba kynthup ia u Myntri kam pohiing ka sorkar pdeng u Amit Shah bad u president ba hakhliehduh ka BJP u JP Nadda bad bun ngut kiwei pat ki C|M kiba dei na ki jylla ba synshar da ka seng BJP.
Ha ka 6 tarik mynta u bnai, u Saha u la kam ban thaw ia ka sorkar hadien ba u la shah jied biang kum u MLA na ka seng BJP ha ka jylla.Nalor kata kiwei pat ruh ki MLA ki la shim smai lang mynta ka sngi.
Ha kane ka ilekshon assembly kaba dang shu kut shen, ka BJP ka la jop haduh 32 na ki 60 tylli8 ki seat.Katba ka Tipra Motha ka la kylla long ka party kaba wan ba ar ha ka jingjop bun eh ki seat kata da 13 seat.
Lah ban kdew ba u Saha u la shah thung kum u CM ka jylla ha u snem 2022 da kaba mih bujli haka jaka jong u Biplab Deb, kata tang khyndiat bnai shwa ban leit sha ka ilekshon.U Deb u la pyniasoh sha ka seng BJP ha u snem 2016 hadien ba u la mih noh na ka seng Congress.
U Deb u la shah jied shapoh Rajya Sabha ha u bnai Lber 2022.
