Shillong, Jylliew 28 : Ka kol ba thep da u Damanbha Chyne ha shwa ban kut artad ka por ialehkai ka la pynlong ia ka Nangkiew Irat ban lait salit na ka jingshah rem ha ka jingiakhun pyrshah ia ka Shillong Lajong ha ka lympung iakhun jong ka Shillong Premier League kaba long ha ka janmiet sngi Palei ha madan Third Ground, Polo.
Ia katei ka kol kaba kongsan tam na bynta ka Nangkiew Irat kaba pynlong artad ia ka jingiakhun ban kut da ka jingiakhaid mar 1-1 kol, u Daman u la ioh ban thep ha ka minit kaba 90+3, kata ha ka por shwa ban kut syndon ka jingialehkai.
Haba phai sha ka jingiakhun ha katei ka sngi, ka Shillong Lajong ka la ioh ban pynkhih jar naduh ka minit kaba 14 jong ka kylla step kaba pynlong artad ia ka kynhun ban ioh lamkhmat tad haduh ban da kut katei ka kylla.
Wat hadien ba la poi ka kylla miet ruh katei ka kynhun kam shym la ailad satia ia ka Nangkiew Irat ba kan ioh pynphai ne pyniakhaid ia ka jingialehkai. Hynrei dei ha ki minit kiba khatduh ba u Damanbha u la ioh ban khyrwit ia ka bol kaba leit beit na syndah jong ka dieng kol ban pynlong ia ka kynhun ban lait salit na ka nam rem.
Dang ha ka jingiakhun kaba la dep ruh, ka Nangkiew Irat ka la mad ia ka jingiakhaid kaba mar 2-2 kol pyrshah ia ka Langsning. Ha kane ka sngi, na ka liang u coach katei ka kynhun u la pynneh beit da kajuh ka kynhun hynrei u shu kylliang tang ia u nongap kol.
Ha kawei ka liang, ka Lajong ka la iakhun tyngeh ban jop namar ha ka jingiakhun ba la dep ka la shah rem ha ka Langsning da 1-0 kol bad shah lamkhmat ruh da 1-0 kol ha ka jingiakhun kaba la pynsangeh noh mar shiteng bad ka Mawlai. Kumta, ka jingiakhun kaba la buh ban pynkut ha kane ka sngi Thohdieng, ka Shillong Lajong ka hap ban iakhun tyngeh.
Ka jingiakhun ha kane ka sngi Palei pat kan long hapdeng ka Mawkhar bad Ryntih.
