Shillong Rymphang 21: U National Vice President ka NPP, u Bah Prestone Tynsong ula ong, ka NPP kam pat shim la iakren ne iapynbeit eiei ruh ba mano ban shimti kum u Myntri Rangbah ka jylla lada ka wan ha ka bor.
“Haduh mynta ka seng NPP kam pat shim la iakren ne iapynbeit eiei, mano ban shimti ia ka kam Myntri Rangbah ka jylla lada ka NPP ka wan haka bor” jubab u Bah Prestone ia ka jingkylli la u Myntri Rangbah yndei na Ri-lum Garo ne na Ri-lum Khasi-Jaintia.
Ula ong ba ia u nongialam yn sa jied hi da ki MLA ka NPP hadien ba la dep ban niew iaka vote haka 2 tarik u Lber.
Halor ka jingkylli balei ba um (Prestone) shim la ioh ban long kum u Myntri Rangbah haka elekshon kaba la dep watla ka Seng NPP kala jop bun na rilum Khasi-Jaintia, u Bah Prestone ula ong, “Baroh nga tharai, ki tip bha ia katei bad dang shen nga la iohi ia kawei ka Video, kaba u President ka UDP u (L) Dr Donkupar Roy ula ong ba yn iathaw iaka sorkar bad la buh kyndon ba u Conrad K Sangma udei ban long u Myntri Rangbah ka jylla.
U Bah Prestone ula ong, kaba donkam mynta ka long ba ym dei ban ailad ia kiba nabar ka Meghalaya ba kin long Myntri Rangbah ka jylla hynrei ia u nongialam dei ban dei na rilum Khasi, Jaintia ne Garo.
Ula ong, ka thong jong ka NPP mynta ka long ban poi shwa sha ka thong bad ban thaw marwei ia ka sorkar.
“Ki Nongialam ka NPP naduh u National President bad nga kum u National Vice President, ka rai ka jong ngi hi ka long kaba shai kdar bad ngi la ong ba ngin pynpoi shwa sha ka thong kata ban ioh 33 ne 34 Seat ban ioh iaka sorkar kaba skhem bad hadien kane, yn sa shim ia ka rai ha kaba iadei bad ka kam nongialam bad baroh kiba shah jied kum ki nongmihkhmat na ka seng kin sa ioh iaka hok ban jied ia u nongialam ha katei ka por” ong u Bah Prestone Tynsong.
