Guwahati, Rymphang 21 : Ki Pulit ka Nongbah Guwahati, hynne ka sngi, kila ioh tam ia katto katne ki lyngkhot metiap jong u Amarjyoti Dey uba shah pyniap dusmon hala ka kurim, kaba la wan bret ha ki thain Dawki.
U Amarjyoti uba la jah naduh u bnai Nailar 2022, la suba ba ula shah pyniap bad shah dain lyngkhot lyngkhai hala ka jong ka kurim ka Bandana Kalita. Kane ka briew kala pyniap ruh iala ka jong ka kiaw bad dain lyngkhot ia ka met kum leh iala u jong u kurim.
Ki Pulit kila lap ia kine ki lyngkhot metiap u Amarjyoti na kawei ka song plastic.
Kat kum ka jingong jong ki Pulit, u Amarjyoti Dey ula jah ryngkat bad ka Kmie naduh ka 17 tarik Nailar bad la ngeit nyngkong ba u lah ban shah rahbor. Hynrei da ka jingtohkit jong ki Pulit, la lap ba ula shah pyniap bad ia ka met jong u la dain lyngkhot lyngkhai.
Ia ka kurim ka Bandana Kalita la kem halor ka jingkynnoh donkti ban pyniap iala u kurim bad ia ka kiaw myn ha ka sngi U Blei.
Kane ka jingshah pyniap ki shikmie shikhun ha kane ka briew kala paw pyrthei ha ka Sngi U Blei, kaba long hynniew bnai naduh ba ka pyniap ia ki. Kane ka jingjia kala jia ha ka dong Noonmati jong ka sorbar Guwahati, ong ki Pulit.
