Guwahati, Rymphang 20 :La iohi kumba ka jingeh na ka bynta ka Barshashree Buragohain kam pat kut satia hadien ba kane ka khynnah thoh poetry na Assam ka la shah kyntu ban wan mih hakhmat ka Sessions Court Golaghat ha ka 28 tarik mynta u bnai.
La pynngat case thymmai pyrshah ia ka Buragohain 20 snem rta hapoh ki kyndon Unlawful Activities (Prevention) Act or UAPA.
Haba kren sha ki lad pathai khubor, u hymmen ka Barshashree Buragohain u Arindom Buragohain u la ong; “Hooid ka la shah khot hajir ha ka Golaghat District Sessions Court ha ka 28 tarik mynta u bnai, kata hadien ba ka jingtian bishar halor ka case kaba la dep jong ka kan sdang mynta, bad yn chargesheet halor kane ka juh ka bynta ha katei ka tarik. Kam pat shym la don satia kano kano ka shithi khot hajir na ki bor ba dei khmih ka ban wan poi ha ka iingsah jong ngi ka ban kyntu ia ka Barshashree ba kan wan mih hakhmat ka iingbishar, hynrei dei u nongiasaid ain jong ngi uba la pyntip ha ngi halor kane ka jingtian bishar.”
“Nga lah ban ong ba ka dei ka jingleh sting ha ka liang jong ki pulit ki bym shym la aijingtip sha ngi halor kane ka jinglong jingman.Jin da la ngi don lypa ia u nongiasaid lehse ngin ym ioh jingtip satia ha kaba iadei bad katei ka jingkhot hajir jong ka iingbishar.Ka Barshashree mynta kan shah tian bishar la kan shah rai pynrem ne pynksan halor ki jingthoh poetry jong ka kiba lam sha ka jingshah kem noh naduh ka 17 tarik u Jymmang 2022,” ong u hymmen ka Barshashree.
Katei ka nongthoh poetry na Teok, Assam ka la ioh lait noh na Golaghat District Jail ha ka 22 tarik u Naitung ka snem ba la dep, kata ar bnai hadien ba ki jingthoh ki jong ka lyngba ka facebook ki la saphriang ha kaba la kynnoh ba ka la pynpaw ka jingkyrshan ia ka kynhun seng lehnoh kaba la shah khein beain ka United Liberation Front of Asom – Independent (ULFA-I).
