Itanagar, Rymphang 17:Ha ka jingpynbna paidbah u Principal Secretary lyngba ka bor ba la pynkup ha u katkum ki kyndon kiba hap hapoh ka Sub Rule (I) jong ka Rule (2) u la pynbna halor ka jingpynsangeh shipor ia ka jingpyndonkam Internet ha ka nongbah Itanagar naduh mynta ka 17 haduh ka 19 tarik Rymphang 2023, khnang ban khanglad na ka jingpynkhein shuh shuh ia ki kyndon ain namar ka pakhang shnong ba la khot pynlong da ka Pan Arunachal Joint Steering Committee (PAJSC) mynta ka sngi kaba la wanrah ka jingshah pynjulor ki jingker jong ki pulit, ka jingbom lathi bad ka jingpyndonkam da ka lyer pynsat khmat.
Ha kawei pat ka bynta, ki nongiakhih pyrshah ki dang iai sah ha ka surok highway ban dawa ban bteng ia ka jingkhot pakhang shnong tad haduh ban da lah ban pynurlong ia ka jingdawa ka jong ki.Ki la ong ruh ba kin leit ban iashim bynta ha ka jingialang bad u Myntri Rangbah (CM) ka jylla ha ryngkat ki katto katne ki kyndon.
Kine ki kyndon ki long ba dei ban pyllait lut ia baroh kito kiba la shah kem khlem kino kino ki kyndon pyrshah ia ki.Baroh kito ki dkhot bad ki longkmie longkma kiba la ngat ha ki jingmynsaw ki dei ban ioh ia ka bai lutskan.Ka sorkar ka dei ban pynpaw shai mano nalor ki nongmihkhmat jong kiba angnud ha ka liang ka ioh kam ioh jam ki ban wan sha ka jingialang.Yn ym pdiang ia kino kino ki kynhun seng samla pule.
Yn rai khatduh halor kane ka jingiakynduh bad u CM tad hadien ka jingmynjur sa ki samla wad kam wad jam kiba pynlong jingiakhih ha ryngkat ki longkmie longkpa katkum ki kyndon jong ka Pan Arunachal joint power steering committee.
Lah ban kdew ba ki samla wad kam kiba angnud ban iakhun ia ki eksamin ba la pyniaid da ka Arunachal Pradesh Public service Commission (APPSC) ki la khot ia ka pakhang shnong mynta ka 17 tarik naduh ka por 5 baje mynstep.
