Shillong, Rymphang 15: Ka jingpyntreikam ia ka Inner Line Permit (ILP) kan ktah iaka kam jngohkai iaka jylla, ong u National Secretary ka BJP u Rituraj Sinha haba jubab iaka jingkylli balei ka BJP ka sngap jar ia ka mat jingdawa ILP haka Election Manifesto ka jong ka.
“Ka ILP kadei ka mat kaba donkam ban iatai bad baroh kiba iadonbynta. Ngi ngeit skhem ba ka don ka daw kaba shongnia ba ki paidbah ki kwah iaka ILP ha ka jylla. Hynrei ngi ngeit ruh ba ka jingkiew jong ka jylla Meghalaya kan dei kaba wan lyngba ka kam jngohkai bad haka liang ka kam jngohkai, bun ki pynpaw ba ka ILP kan pyrkhing kaba lah ban wanrah iaka jingduhnong haka liang ka kam jngohkai” ong u Sinha haba iakren bad ki nongpathai khubor hadien bala dep pyllait iaka Election Manifesto jong ka BJP hynne ka sngi.
Ula ong, kane ka mat ka donkam ban iatai sani bha, kumta kin sa iakren bad baroh kiba don bynta hadien ka elekshon bad u kyrmen skhem ba yn sa lah ban shim ia ka rai kaba khatduh ha kaba iadei bad ka ILP.
Lah ban ong, u MLA ka BJP na South Shillong u Bah Sanbor Shullai man la ka por u ju kren da kaba ong “Ai ia ngi 31 ngut ki MLA, ngi ngin ai iaka ILP” hynrei kaei kaba mih na ka jingkren jong u National Secretary ka BJP, ka paw kumba ka BJP ka ialeh politik ha kaban pynslem ban pyntreikam iaka ILP ha ka jylla Meghalaya.
Lah ruh ban kdew ba ki MLA ka BJP kiba kynthup ia u Bah Sanbor Shullai bad Bah AL Hek kidei kiwei napdeng ki 60 ngut ki MLA kiba la mynjur iaka Resolution hapoh ka ïingdorbar thawaiñ ka jylla ban dawa naka sorkar pdeng ban pyntreikam noh iaka ILP ha ka jylla Meghalaya.
