Shillong Rymphang 11: U AICC General Secretary In charge for Media, Publicity and Communication u Jairam Ramesh, hynne ka sngi ula pyllait paidbah iaka Election Manifesto jong ka seng Congress haka jingialang kaba la long ha Vivanta Hotel, Shillong ryngkat ka jingdonlang u President ka MPCC u Bah Vincent Pala, ki nongialam ka AICC bad MPCC.
“Ia ka Meghalaya la tip kum ka jylla kaba dap da ki lyoh, hynrei mynta kine ki lyoh kila don pat da kiwei ki jingmut, mynta kim dei shuh ki lyoh kiba wanrah ia u slap hynrei kine ki lyoh kidei ka kam bamsap, jingkyrduh kam kyrduh jam, ka jinglip bording elektrik khah khah bad ki lyoh kiba pynjulor iaka jinglong tynrai ki paidbah ka Meghalaya bad kidei ki lyoh jong ki Political Puppets” ong u Jairam Ramesh.
Ula ong, ka seng Congress ka iakhun iaka elekshon ban iakhun pyrshah ia ki lyoh jongka kam bamsap, ka jingkyrduh kam, ka jinglip bording khah khah bad ban iakhun pyrshah ia u Drug bad seng Congress ka iakhun iaka elekshon pyrshah ia kitei ki 4 tylli ki seng sain pyrthei kiba ialam da ka BJP.
“Ha ka manifesto jong ka Congress ki don 14 tylli ki jingkular kiban treikam ha baroh 5 snem bad man la ka snem ka seng Congress kan pynmih iaka kaiphod ia ka jingpyntreikam ia kitei ki jingkular. Ngi la ai ruh iaka jingkular ban pyntreikam ia ki 5 tylli ki jingkular dang myn shi sngi, ban pynkup bor ia ki kynthei kiba kamai marwei da kaba ai jingiarap ia ki T.3000 shi bnai, ban ai kam iwei na man la ka longing, ban aibording ei ia ki Longiing BPL, ban pynduh iaka jingpynlip bording khah khah, ban pynlong iaka Meghalaya kaba lait na u Drugs bad kaba kham kongsan kadei ban pynlong iaka jylla kaba lait na ki kam bamsap bad ngin pyntreikam da ki aiñ ban tehlakam ia ki kam bamsap” ong u Nongialam ka seng Congress bad ka pynpaw iaka jingskhem jingmut ba ki paidbah ka jylla kin pynjop biang iaka seng Congress.
U Ramesh ula ong kitei ki jingkular ka Congress kidei kiba lah ban pyntreikam watla ka don ka jingbun haka jinglut jingsep bad ula ong, ha ka por ba ka Congress ka synshar iaka ri kala don ka jingwohnia na u Narendra Modi ba kan ym lah ban pynurlong ne ban pyntreikam iaka Mahatma Gandhi National Rural Employment Gurantee Act ne National Food Security Act hapoh ka ri baroh kawei hynrei ka Congress kala lah ban pyntreikam ia kitei ki aiñ.
Ula ong, ka sorkar MDA kadei ka “Money Development Alliance” bad ki seng sain pyrthei kiba donlang ha katei ka sorkar synroplang mynta kila ia shong khlad shipor namar ka elekshon bad ki kam ba ki iakhun marwei iaka elekshon, hynrei ym don kiba biej namar ka NPP, UDP bad ka BJP kidei kiba iadonbynta lang ha kajuh ka thup.
“Ngi don ia u nongpynshad ia ki Puppet uba shong ha Delhi bad ha Meghalaya ngi don ia ki Puppet kum ka NPP, UDP bad u Puppet uba dang thymmai ka TMC ne ka Judas Mukul Party (JMP). Kine baroh kidei kiba don haka ‘Game Plan’ jong ka BJP, ia kaba ka NPP kadei ka Team A jong ka BJP, ka UDP kadei ka Team B jong ka BJP bad ka TMC ne JMP kadei ka Team C jong ka BJP” ong u Jairam Ramesh.
Katba u Bah Vincent Pala ula ong, ka BJP kala shu pyntieng kohtympan ia ki paidbah ka jylla, da kaba kam ba lada ym jied iaka BJP yn ym ioh pisa bad lada ym vote iaka BJP yn ym ioh thaw ia ka sorkar.
“Ka BJP kan ym lah ban pyniaid iaka sorkar lada dei kaba don tang kawei ne artylli ne shiphew tylli ki enjin, hynrei kin dei hi ki paidbah ka Meghalaya kiban pyniaid iaka jylla bad kin dei hi ki nongialam ka jylla kiban pyniaid iaka jylla bad nga artatien ba ka BJP kan jop 2 ngut ruh ha kane ka elekshon” ong u Bah Pala.
