Shillong Rymphang 11: Ka KSU Laban Circle hynne ka sngi Saitjaiñ kala hiar tohkit ia kawei na ki Petrol Pump kaba don ha Anjali, Rhino bad lap ba ka jingthew iaka petrol kam long kaba biang satia.
Ka KSU kala hiar tohkit ia kane hadien ka jingioh pdiang ia ki jingujor ba kane ka petrol pump kam ju thew hok ia ka umphniang bala wan thep da ki kali.
U General Secretary ka KSU Laban Circle samla Jason Laloo, ula pynpaw ba ki paidbah kila ujor sha ka seng ba ka don ka jingthew thok iaka petrol ha katei ka jaka ai umphniang kumta ka seng kala leit ban tohkit bad kala lap ba ka jingthew kam biang.
Ula ong ba ki nongtrei ha kane ka jaka ki ju pynbiej pynthame iaki briew da kaba theh duna ia ka petrol, da kaba kah ia u Meter ba kin ym iohi katno ki theh iaka petrol.
Ka seng kala lap ruh ba kine ki nongtrei kiba wan ba bar jylla kiba trei ha kane ka Petrol Pump kim shim la biang satia ia ki kot ki sla.
Ka Seng kala maham jur ia u trai jong kane ka petrol pump ba udei ban pynbit pynbiang ia u Meter bad ia ka jingthew bad kala dawa ruh ba dei ban beh kam noh ia baroh ki nongtrei kiba leh thok ia ki paidbah lym kumta ka KSU kan khang khyrdep ia kane ka Petrol Pump.
