Guwahati, Rymphang 09: U khlur ka Hollywood u Leonardo DiCaprio u la ai ka jingiaroh ia ka sorkar Assam halor ka jinglah ban iada ia ki Rhino na ki nongsiat mrad hapoh Kaziranga National Park, kaba dei ka jaka kaba don haduh ar haduh lai bynta na kine ki jait mrad ha ka pyrthei.
Lyngba ka Instagram, une u khlur ka phlim Titanic u Caprio u la thoh; “Ha u snem 2021, ka sorkar jylla Assam ha India ka la shim ia ka sienjam ban pynkut ia shisyndon ha kaba iadei bad ka jingshah pyniap dusmon jong kine ki jait mrad (Rhino) ba shi reng kiba la jan duhjait hapoh Kaziranga National Park, kata hadien ba haduh jan kumba 190 tylli na kine ki jait mrad ki la shah pyniap dusmon tang na ka bynta ka reng ka jong ki hapdeng ka snem 2000-2021.Ha u snem 2022 ka sorkar ka la poi sha ka thong bad ym shym la don shuh ki rhino ki ban dang shah pyniap ha katei ka jaka kaba dei ruh ka sien kaba nyngkong eh naduh ka snem 1977.
“Ka Kaziranga National Park ka dei kaba don haduh 2,200 tylli ki Rhino ba shi reng, kaba long haduh kumba ar haduh lai bynta na ka jingdon jong kine ki jait mrad ha ka pyrthei.Kumta ruh ka jingnang roi jong kine ki jait mrad ha India ka dei ka khubor kaba bha, bad la ong ruh ba ka jingdon jong kine ki rhino kiba kham pher ha ka pyrthei ka la kiew sha ka 3,700 na kumba 200 naduh kane ka spah snem baroh,” thoh shuh shuh u Caprio.
