Shillong, Rymphang 07 : U Nongialam ka Congress Bah PN Syiem hynne ka sngi ba-ar, ula leit thep kyrteng kum u kyrtong ban aireng ha ka elekshon MLA-2023 bad pynpaw ia ka jingsngewskhem ba ki paidbah ka Pynthorumkhrah kin vote ia u na ka bynta ka roi ka par jong ka constituency ha baroh ki liang.
Haba kren sha ki lad pathai khubor, u Bah PN Syiem ula kam ba ki don bun ki kam kiba hap leh hapoh ka constituency namar haduh mynta kam don satia ia ki nala kiba biang, ki lynti iaid, ki surok bad ka jingsam umbam umdih nalor ka jingbym don ki madan ialehkai jong ki samla khlem da iakren ia ki sports complex bad kiwei kiwei.
“Ki don shibun kiei kiei ba hap ban leh hapoh ka constituency bad nga kyrmen ba ki paidbah kin vote ia nga bad ngan sa iakren ia kine ki kam bad ka Sorkar” ong u bah Syiem.
U Bah Syiem ula ban jur ba kam don satia ka roi ka par ha Pynthorumkhrah bad da ka mat jong ka roi ka par, ki paidbah ka constituency kin vote ia u khnang ba ki kam pynroi kin wan ym tang ha Pynthorumkhrah hynrei ha ka Jylla baroh kawei.
Ula bynrap ruh ba ha ka por elekshon, kam don satia kano kano ka kam kaba suk hynrei kum u kyrtong hi u hap ban trei lang bad ki paidbah lem bad ki nongialam bad ki nongkyrshan khnang ba un ioh ia ka jingjop namar ka Jylla ka donkam ia ki nongthaw ain kiba sngewthuh kumno ban thaw ia ki policy bad ban shna ain.
Haba iadei bad ka jingsei kyrtong ka Congress da ki dur thymmai ha kane ka elekshon, u Bah Syiem ula ban jur ba kine ki dur thymmai ki sngew skhem bad la kyrmen skhem ba kin jop ia ka elekshon khnang ban ioh ia ki nongthaw ain kiba biang bad ba ka Jylla kan kiew.
“Ngan pynkynmaw ia phi ba ka PDF kam don MLA ha ka por ba ka rung sha ka jylli sain pyrthei hynrei ka jop 4 ngut ki MLA, ka NPP ka don tang 2 ki MLA hynrei ha ka elekshon kala jop 20 tam..ta ka daw ngim don jingeh bad ka shong ha ki kyrtong bad ka nongrim jong ka party ba kin vote ki paidbah” ula bynrap.
