Agartala, Rymphang 06: UMytri ka sorkar pdeng u Amit shah u ba la wan poi ha Agartala, Tripura mynta ka sngi nyngkong ban iashim bynta ha ka rally ialap ilekshon, u la kynthoh ia ka Communist bad ka party Congress halor ka jingpyntreikam ia ki polisi treikam jong ka jingpyntieng pynsmiej ha ka jingsynshar ka jong ki ha kine ki 50 tylli ki snem kiba la leit noh.
Haba iashim bynta ha ka rally ha Shantir Bazaar, Tripura mynta ka sngi, u Amit Shah ula ong ba Communist bad ka party Congress kim shym la leh ei ei ha kine ki 50 snem kiba la leit noh. “Ha kine ki san snem kiba la dep, ka BJP ka la trei khlem shongthait na ka bynta ki kam pynroi ha ka jylla Tripura.Ngi la pynkylla ia ki polisi treikam jong ka jingpyntieng pynsmiej jong ka communist bad ka congress sha ka polisi jong ka jingieit.
Da kaba kynthoh pyrshah ia ka party TIPRA Motha, u Amit Shah u la ong ba kane ka party kala iatreilang napoh napoh bad ka Communit kumjuh bad ka party Congress ha ka kyrteng ban pynioh ia ki hok na ka bynta ki nongshong shnong kiba dei ki Adivasi.
“Nga kwah ban buh jingkylli ia ka CPI(M), ha ka jingsynshar kaba 27 snem jong ki katba tylli ki longiing ki la lah ban pynioh ia ka umbam umdih? U PM Modi u la lah ban pynip um tang hapoh ka 5 snem.Ka Motha ka la sdang sa da kawei apt ka jingialeh na ka bynta ban aijingkyrshan ia ka party Communist,” ong u Amit Shah, uba la bynrap; ruh ba ka BJP ka la pynioh haduh T.562 klur na ka bynta ki kam pynroi na ka bynta ki longkmie haba ia nujor bad ka T.8 klur ba la pyntreikam da ka sorkar Communist.”
Haba kren halor ka jinghiar arsut jong ki kam pyntriem bad halor ka jingwanphai pat jong ka jingsuk ha Tripura, u Amit Shah u la ong naduh ba ka BJP ka la wan rung ha Tripura la sakhi ia shibun bah ki kam pynroi ha kito ki jaka shong shnong jong ki Adivasi kumjuh.
Lah ban kdew ba kane ka dei ka sien wan jurip kaba ar da une u Myntri kam pohiing ka sorkar pdeng sha kane ka jylla mynta u snem.Kham hashwa, kata ha ka 5 tarik u Kyllalyngkot ba la dep, u Amit shah u la wan iashim bynta ha ki artylli ki jingleh niam (Rath Yatra), kata wei na Dharmanagar ha ka thain shatei ka Tripura bad na Sabroom ha ka thain shathie ka Tripura.
Dang shen u national president ka BJP u JP Nadda ruh u la pynlog ka jingwan jurip shapoh Tripura ha kaba u la aijingkren ruh ha ka rally paidbah ha Amarpur hapoh Gomti district ka Tripura.
Hadien ka jingjop kaba khraw ha ka snem 2018, ka saffron party (BJP) ka la pynkhreh sa ia kawei pat ka jingjop ha Tripura ha kaba kala bteng ruh ia ka jingiateh lok bad ka paralok Indigenous People’s Front of Tripura (IPFT) kaba la pynieng kyrtong ha ki santylli ki Assembly seat.
Ka BJP ka la pynieng 55 ngut ki kyrtong ha kane ka ilekshon kaba don 60 tylli ki seat hapoh kane ka jylla ka thain shathie lammihngi (Northeast) ka ban leit sha ka jingiathep vote ha ka 17 tarik mynta u bnai Rymphang.
