Shillong, Rymphang 04: U Kyrtong ka NPP na North Shillong Constituency Bah Ransom Sutnga, ula pynpaw ba u don ka jingngeit kaba skhem ha ka jingpyniaid jong u Blei ba un jop ia ka elekshon lyngba ka jingwan ai jingkyrshan jong ki nongialam bad ki paidbah ka constituency.
U Bah Ransom ula kren ia kane hadien ka jingthep kyrteng kum u kyrtong ban iakhun ha kane ka elekshon MLA-2023 ka ban long ha ka 27 tarik Rymphang. Ia u Bah Ransom la synran da I Kurim, ki Nongialam ka NPP bad ki Nongkyrshan napoh ka Constituency.
“Nga don ka jingngeit kaba skhem ha ka jingpyniaid jong u Blei ba ngan jop iaka elekshon bad da ka jingkyrshan ka iing ka sem jong nga, ki paralok, parajor bad ki paid nongkyrshan ngan poi sha ka thong 100 na ka 100” ong u Bah Ransom.
Ha kaba iadei bad ka jingbyrngem ka UDP ban ujor sha ka tnad Elekshon, halor ka jingleh shilliang u Myntri Rangbah ka jylla haba iadei bad ka jingpyllait skhim lyngba ka Chief Minister’s Special Development Fund (CMSDF), kaba la pynpaw iaka kyrteng jong u kum u kyrtong ka NPP ban pyntrei ia ki kam, u Bah Ransom ula pynshai da kaba ong, “Ka jingkynthoh ka jong ki kadei namar ba kim tip, ha ka jingshisha ia nga la shu ai kopi katba iaka jingbhah tyngka la ai beit sha ki shnong bapher bapher naka bynta ka skhim kaba T.58 lak tam”.
“Ia kitei ki skhim la ai sha ki 9 tylli ki shnong kam dei ba ai ia nga, hynrei la shu ai kopi ia nga namar ba nga dei uba iakren na ka bynta kitei ki shnong kiba donkam ia kitei ki skhim bad kam dei satia ba ki ai kopi ba ngan ioh jingmyntoi ma nga hynrei ki ai kopi tang ba ngan tip namar dei ma nga uba iakren bad u CM” ula ong.
U Bah Ransom ula ong ba u dap da ka jinglyngngoh ba u Bah Allantry watla u dei u nongaibuit barim jong u CM hynrei kat ka kyrdan ka jong u, un shu kynthoh kumtei bad ka paw ba ka don haei haei ka jingduna, lehse ka sorkar ka long haduh katne ruh ka long ba don kum kine ki Adviser sha u CM bad lada ka NPP kan thaw sorkar marwei kum kine kin ym jia shuh.
“Kaba donkam eh hapoh ka North Shillong Constituency kadei ka jingbym iohkam iohjam ki samla bad kane kadei kaba hakhmat eh bad kala dei ia ngi ban pynmih ia kiwei kiwei ki lad ki lynti bad ban ialam ia ki samla ha kiba bun ki liang ym dei eh tang ha ki kam sorkar” ong u Kyrtong ka NPP.
U Bah Ransom ula ong ruh, “Ka ishu Them Metor kam dei shuh ka ishu kaba thymmai hynrei ka dei ka ishu kaba rim, kumta ngan iai buddien haei ka sahteng bad haei ka sahkut”.
Une u kyrtong ula pynpaw ruh iaka jingkmen ba shwa ba yn leit thep kyrteng kila don ki nongialam ka seng Congress bad BJP kiba la wan ban pyniasoh bad ka seng NPP ban ai jingkyrshan ia u.
