Shillong, Rymphang 04: U Myntri Sorkar barim ka jylla Bah Samlin Malngiang ula pynpaw ba kan bha shibun ia u Bah HDR Lyngdoh ba yn shongthait noh da kaba don burom kumba la pyn paw da ka iing ka sem jongu hynrei ban ieh beit noh ha u ba yn peit iaka Sohiong Constituency.
Une u MLA barim ka HSPDP ba la kynthih sha ka NPP, ula kren ia kane hadien ka jingthep kyrteng kum u kyrtong ka NPP ban iakhun ia ka elekshon MLA-2023 na Sohiong constituency.
“Nga don ka jingshaniah kaba skhem ba ngan jop biang iaka elekshon namar nga la trei shitom ha baroh 5 snem ha kylleng ki shnong ki thaw bad ki paidbah kila dep ban bishar bniah iaka kam kaba la trei da u Bah HDR Lyngdoh ha kine ki 25 snem kiba nga la trei tang ha kine ki 5 snem ba wanrah iaka jingkylla ha ka Constituency baroh kawei” ong u Bah Samlin.
Ha kaba iadei bad ka jingkren u Bah HDR Lyngdoh ba lada u jop ia ka elekshon yn hap ban maramot bad pynbha biang iaka Constituency kaba la jot bad julor ha kine ki 5 snem, u Bah Samlin ula ong, “Kaei kaba pynlong ia u Bah HDR ban ong kumta, ka long kaba bakla. Nga iohi ba wat u Pyrsa trai jong u Bah HDR ha u snem 2018 ula ong ba u Bah HDR ula noh palat ka rta bad mynta I para trai (Kongrit) jong u Bah HDR Lyngdoh ila ong ba u dei ban shongthait noh namar ba ka rta ruh kam long shuh hynrei la dei ban sngewnguh ia u paidbah ban shong da kaba don burom”.
“U Bah HDR ula ieng tang ban shu dep rukom namar ka rta kam long shuh. Nga iohi ba ka iing ka sem u Maheh kam biang kumta u Maheh u dei ban pynbeit pynbiang shwa ia ka iing katba nga pat ngan pynbit pynbiang iaka Sohiong constituency hi baroh kawei” ong u Bah Samlin.
