Shillong, Rymphang 04: Ki kyrtong jong ka Voice of the People Party (VPP) na East Khasi Hills hynne ka sngi saitjain, kila thep kyrteng kum ki kyrtong ban iakhun ha kane ka elekshon ka ban long ha ka 27 tarik mynta u bnai.
Kine ki kyrtong ki kynthup u President ka VPP bah Ardent Basaiawmoit na Nongkrem constituency, bah Adelbert Nongrum (North Shillong), bah Raja Jyrwa (West Shillong), bah Heaving Stone Kharpran (Mawryngkneng), bah Doristar Marbaniang (Mawphlang), bah Brighstar Marbaniang (Mawlai), bah Manbhalang Thabah (Pynursla), bah Winstone Tony Lyngdoh (Nongthymmai), bah Avner Pariat (East Shillong) bad u bah Danny Langstieh na (South Shillong).
Haba kren sha ki lad pathai khubor u President ka VPP u bah Ardent M Basaiawmoit ula ong ka thong jong ka Party kadei ban pynsngewthuh ia ka thong bad ka nongrim jong ka party.
U bah Ardent ula kam ba ka Nongkrem constituency, ka don ka jingsngewthuh jong u paidbah ha kylleng ki Ri bad ki paidbah ha kine ki sngi ki la sdang sngewthuh ban jied ïa ki nongïalam.
U la iathuh ba shen ka seng kan pynbna ïa ki mat treikam jong ka seng hynrei ha shwa ïa kata kin sa pyllait shwa ïa ka ‘Vision Document’ jong ka seng ha kine ki khyndiat sngi.
“Ki mat ba hakhmat eh jong ka seng VPP ka long ban weng ïa ki jingkit bakhia jong ki paidbah kaba la ban khia ïa ki paidbah kata ka ba mut ka pang ka shitom, ka pule ka dangle bad ka ïoh ka kot jong ki paidbah nalor kiwei pat ki mat ki ba bun” la ong u bah Ardent.
U bah Ardent ula ong ba ha ka elekshon 2018 u shah rem tang 76 vote bad ka 2 tarik hi kan rai bad yn tip la ki paidbah ki pdiang bad ki hun ne em ïa ka rukom treikam jong u MLA jong ki ha kine ki 5 snem bala dep.
Naka liang u MLA barim ka North Shillong u ba la iasoh bad ka VPP bah Adelbert Nongrum u la ong ba ka rai jong u ban pynïasoh bad ka seng VPP ka long ba ym don jingshaniah shuh ha kiwei ki seng saiñ pyrthei.
U bab Adelbert u la ong ba ha ki 5 snem ba la dep ka sorkar jylla ba ialam da kiwei ki seng saiñ pyrthei kim lah ban wanrah ka jingkylla hapoh ka jylla hynrei ki la nang teh nang khum pynban ïa ki paidbah bad nang pynhiar arsut ïa ka jylla.
Ula ong ong ba kane ka jingiasoh noh bad ka VPP kadei ban wanrah ka synshar khaddar ka ba khuid ba suba naka bynta ka bha ka miat ki paidbah bad ka jylla Meghalaya baroh kawei.
