Shillong, Rymphang 02 : U National Vice President ka National People’s Party (NPP) bad Symbud Myntri Rangbah ka Jylla Bah Prestone Tynsong, hynne ka sngi palei, ula kynnoh ba u Nongialam ka Liang Pyrshah bad Myntri Rangbah barim Dr Mukul Sangma lem bad ka kynhun jong u, ki don jingthmu ban shet kylla ia ka All India Trinamool Congress (AITC) da kaba leit iasoh sha ka Bharatiya Janata Party (BJP) hadien ka elekshon 2023.
U Bah Tynsong ula iathuh ha ki nongthoh khubor ba kala don lypa ka jingiapynbeit hapdeng u Dr Mukul bad ka BJP.
“Nga tip ia ka plan jong u (Mukul). Lada u jop 3-5 seat un sa leit iasoh sha ka BJP. Ka dei ka jingshisha ba kala don ka jing iapynbeit hynrei ngam tip kumno tangba u Dr Mukul un sa mih na ka TMC” ula ong.
Kat kum ka jingong jong u, u Myntri Rangbah ka Jylla Conrad K Sangma ula dep ai ksai ia kane ha kawei na ki jingialang paidbah ba long ha Ri-lum Garo.
Haba kyntu ia ki paidbah ban nym shaniah ia ka jinglong nongialam u Dr Mukul, u Bah Prestone ula ong “Ha kano kano ka por u lah ban kynthih namar u tip bha ba un nym jop bun seat ha kane ka elekshon”.
Haba pynpaw ba kam don satia ka jingshisha halor ka jingkynnoh u Dr Mukul bad ka NPP ka dei ka B-Team jong ka BJP, u Symbud Myntri Rangbah ula ong tangba kawei la thikna ba une u Nongialam ka Liang Pyrshah un sa rung sha ka BJP hadien ka elekshon.
Ha ka 23 tarik Kyllalyngkot, u Conrad ula maham ia ka Chairperson ka AITC Mamata Banerjee halor ka jingthmu ki nongialam jong ka ha Jylla ba ki thmu ban shet kylla ia ka party bad ong “Madan Mamata Banrejee, bun ki nongialam kiba rung sha phi mynta, bun ki nongialam na kiwei ki party kila rung sha ka TMC. Hynrei nga iathuh ha phi bad kane kam dei ka jingkren jong nga u Conrad, ka dei ka khana kaba iaid ha iew ha hat bad lah ruh ban kylli nangno nangno, phi don bun ki briew ha kyllen ki jaka bad kin iathuh ha phi, ba bun ne kine ki nongialam ba rung sha ka TMC kiba don jingthmu lypa ban ieh ia ka TMC hadien ka elekshon. Kila dep iakren lypa bad kiwei pat ki seng, kila dep kren ia bun ngut ki briew. Ngam shym ong ia kane, kane ka dei ka khan aba pur ha ki iew ki hat bad ka jylli sain pyrthei”.
