Karbi Anglong, Rymphang 02 :Ha ka thma drok kaba dang iai bteng, ki pulit ka Assam mynta ka sngi 2 tarik ki la ioh ban kurup ia u drok heroin uba shongdor haduh T.6-7 klur na ki bynta jong ka Karbi Anglong district ka Assam.
Hadien ba la ioh ia ka jingtip kaba bniah, ki bor pulit ki la ioh ban kurup noh ia utei u drok bad kem noh ia laingut ki briew ha ki artylli ki jingkhynra.
“Une u drok heroin uba don ka jingkhai kaba 1.304 kilo u shongdor haduh 6-7 klur ha ki jaka iew beain ka pyrthei ia uba la ioh ban kurup noh da ki bor pulit napoh Karbi Anglong district mynta ka sngi”, ong u John Das uba dei u SDPO ka Bokajan.
Ha ka jingkhynra kaba nyngkong, ka kynhun ki pulit ki la ioh ban kurup 304 gram u drok heroin na ki bynta jong ka Laharija bad kem noh ia uwei u briew uba kyrteng u Fayas Uddin (18 snem rta) uba dei na ka thain Doboka.
U SDPO ka Bokajan u John Das haba kren sha ki lad pathai khubor u la ong ba ki pulit kiba pynlong ka jingap shrip hakhmat ka Laharijan police point hadien ba ki la ioh ia ka jingtip kaba bniah.Ha kane ka jingkhynra la iadon ryngkat lang u ASI Jiten Gogoi na Laharaijan PP, SI (P) Sarat Kakati, ki dkhot na ka C20 CRPF Camp Bokajan.
Ki bor pulit ki la bat noh ia kawei ka kali kaba don ia u nombor AS-02CC-2548 bad ha ka jingkhynra ki la lapdien ia ki 25 tylli ki synduk sabon ki ba don 304 gram u drok heroin.Katba ha ka jingkhynra kaba ar la iashim bynta da ki bor pahara hapoh Diphu railway station.
Ha kane ka jingkhynra ki pulit ki la ioh kurup shi kilo u drok heroin bad kem noh ia arngut ki briew ia kiba la tip kyrteng kum u Chandra Sekhar Sen (45) bad u Dhiraj Solanki (30 snem rta), kiba dei na ka shnong Jhalawar kaba hapoh Rajasthan, ong ki heh pulit haba kren sha ki lad pathai khubor.
