Shillong, Rymphang 01: U MLA barim ka Ranikor constituency Martin M Danggo hynne ka sngi ula pyniasoh ialade shaka Bharatiya Janata Party (BJP) ha ka jingdonlang ki nongkyrshan kiba wan na kylleng ka constituency.
Ia u Danggo la pdiang sngewbha da u Myntri ka tnat Arts and Culture bah Sanbor Shullai ha ka jingdonlang kiwei ki nongialam ba rangbah ka BJP ba kynthup u bah Shibun Lyngdoh lem bad kiwei kiwei de.
Lah ban kdew ba u Danggo udei u kyrtong ba ka National People’s Party (NPP) kala pynbna ban iakhun ha kane ka elekshon ban wan na Ranikor constituency hynrei haka 30 tarik Kyllalyngkot, ki nongkyrshan u Danggo kila mih noh naka NPP ban iasoh shaka BJP.
Haba kren sha ki lad pathai khubor u Danggo u la ong ba ka jingmih jong u na ka NPP ban iasoh shaka BJP kadei hadien ka jingiakren pynbeit bad sngewthuh jingmut bad ki nongkyrshan bad nongialam jong u na Ranikor constituency.
U Danggo ula ong ba ki nongkyrshan jong u kila suba ba ka NPP kam kwah ia u ban jop ha kane ka elekshon bad dei namar kane ula iaphylliew jingmut bad ki nongkyrshan ban iasoh noh shaka BJP naka bynta ban pynkhreh ban jop ha kane ka elekshon ban wan.
“Mynta ka sngi baroh ki nongkyrshan jong nga ki don hangne hadien ba kila mih naka NPP haka 30 tarik Kyllalyngkot bad kum u nongialam jong ki, nga sngew dei ban bud lang iala ki paidbah ban pyniasoh noh shaka BJP” la ong u Danggo.
U Danggo ula ong ba udei tang u nongialam jong ki hajar ngut ki paidbah bad ki paidbah bad ki nongkyrshan jong u ki kham tip bha ha kano ka Party ka ba itbit ban iasoh bad namar ba ki paidbah ka Ranikor kila rai ban mih naka NPP, kum u nongialam u hap ban bud katkum ka jingai jingmut jong ki.
U la bynrap ba ka shong ha ka rai bad ka jingkwah jong ki nongkyrshan jong u ban jubab kumno namar u shu kohnguh bad mynjur beit ïa ka jingkwah ki nongkyrshan jong u namar dei ki nongkyrshan bad ki paidbah ki ban shim iaka rai khatduh ban pynjop ne pynrem ia u ha kane ka elekshon ban wan.
