Gangtok, Rymphang 01: Hadien ba ka iingbishar Supreme Court ka la shim bad pynbna ia ki Nepali nong Sikkim kum ki tynrai kiba na shabar jong ka ri, ka Sikkim ka la sakhi ia ki jingiakhih ba jai jai ha baroh ki thain shatei mihngi ka jylla.
Kine ki nongiakhih pyrshah ki la ai por ruh hynniew sngi ia ka sorkar jylla ba kan leh ia kaba donkam bad ban pynbeit halor kane kane ka kam banbein.
Ym tang hapoh Sikkim, hynrei ha Darjeeling ruh la sakhi ia ki jingiakhih pyrshah ia katei ka jingpynbna jong ka Supreme Court.
Ha ka 13 tarik u Kyllalyngkot ba la dep, hadien ba la pynbna ia ka rai halor ka jingujor pyrshah da ka Association of Old Settlers of Sikkim (AOSS), kaba dawa ban pyllait khajna na ka bynta ki nongshong shnong kiba la rim, kata kiba la shong la sah ha Sikkim naduh shwa ka jingpyniasoh bad ka India ha ka 26 tarik u Iaiong 1975, katei ka iingbishar ba hakhliehduh ka la shim ia ka rai ban pynbna ia ki Nepali ka Sikkim kum ki briew kiba dei tynrai na shabar jong ka ri.
Nalor katei katei ka iingbishar ka la pyllait ruh ia kine ki nongshong shnong ba la rim kiba dei tynrai na India na ka jingoh khajna ne income tax.
Ha kane ka sngi ba Ar ba la lah ka joint action committee (JAC), ba la thaw ha kine ki khyndiat sngi ba la dep ka la khot pynlong da ki rally ha baroh ki hynriew tylli ki district jong kane ka jylla ka thain Himalaya.
Ka JAC ka la dawa ruh ban weng noh ia u Sudesh Joshi uba dei u additional advocate general ka Sikkim.
Na ka liang u Jacob Khaling uba dei u political secretary na ka bynta u Myntri Rangbah (CM) ka Sikkim, u Keshav Sapkota, general secretary ka JAC, u Bhaichung Bhutia president jong ka Hamro Sikkim Party, u KB Rai, president jong ka Sikkim Republican Party ryngkat lang ki la pynrem jur ia katei ka jingpynbna jong ka iingbishar ba hakhliehduh ka ri.
