Kohima, Rymphang 01: U T Yangseo Sangtam bad u Thongwang Konyak baroh arngut kiba dei ki dkhot jong ka Nagaland Legislative Assembly (NLA) kila phah ia ka shithi iehnoh kam hashwa ka jingpynlong ia ka ilekshon assembly ha ka 27 tarik mynta u bnai.
Kine ki arngut ki nongmihkhmat, u Sangtam uba dei u independent MLA napoh 60 Pungro-Kiphire assembly, u dei u Symbud Lamphang ka Nagaland Legislative Assembly, katba u Konyak u dei u ba la shah jied na ka tiket jong ka party Nationalist Democratic Progressive napoh 46 Mon town assembly constituency.
Na ka liang ka NLA secretariat lyngba ka DIPR hynnin ka sngi ba Ar ka la pynbna ba na ka liang u Lamphang ka NLA u la pdiang ia ka shithi iehnoh kam ka jong ki na ka jinglong dkhot hapoh ka 13th NLA naduh ka janmiet jong ka 30 tarik u Kyllalyngkot ba la dep bad pynbna ba ki seat jong ki, kila long thylli.
Ha kawei pat ka bynta, na ka liang ka Election Commission of India ha ka 31 tarik u Kyllalyngkot 2023 ka la pynmih ia ka jingpynbna ha kaba iadei bad ka ilekshon sha ka 14th Nagaland Legislative Assembly.Baroh ki 60 tylli ki constituency ha ka jylla kin leit sha ka jingiathep vote ha ka 27 tarik mynta u bnai.
Hadien katei ka jingpyntip, na ka liang u Lat ka Nagaland u la wer ia baroh ki Assembly constituency ha ka jylla ba kin jied ia ki nongmihkhmat jong ki sha ka iingdorbar thawain ka jylla, pyntip u chief electoral officer ka Nagaland u V Shashank Shekhar ha kane ka sngi ba Ar ba la lah.
Katkum ka jingpyntip, ka jingleit thep kyrteng ka la sdang naduh hynnin ka 31 tarik Kyllalyngkot.Ka Commission ka la pynskhem ia ka 7 tarik kum ka sngi ba khatduh na ka bynta ka jingthep kyrteng.
